Eýranda ykdysady krizisiň çuňlaşmagyna garşy başlan protestler ölüm howply netijelere getirdi. Ýurduň günbatar böleginde protestçiler bilen howpsuzlyk güýçleriniň arasyndaky çaknyşyklarda azyndan alty adam ýogaldy.
Protestler paýtagt Tähranda ýekşenbe güni dükanlaryň eýeleriniň bahalaryň ýokarlanmagyna we ykdysady çökgünligiň dowam etmegine garşy protest bildirmek üçin iş taşlamaklary bilen başlady. Şondan bäri protestler köp şäherlere ýaýrady we talyplaryň we beýleki toparlaryň gatnaşmagy bilen giňeldi.
Eýranyň “Pars” habar agentligi penşenbe güni Çaharmahal we Bahtiýari welaýatynyň Lordegan şäherinde howpsuzlyk güýçleri bilen protestçileriň arasyndaky çaknyşyklarda iki adamyň, goňşy Luristan welaýatynyň Azna şäherinde bolsa ýene-de üç adamyň ölendigini habar berdi.
“Pars” habar agentliginiň maglumatyna görä, polisiýa protestçileri dargatmak üçin göz ýaşardýan gaz ulandy we resmiler tarapyndan “gurama baştutanlary” diýlip atlandyrylan birnäçe adam tussag edildi. Çaknyşyklarda köp sanda bina uly zeper ýetdi.
Eýranyň döwlet telewideniýesi penşenbe güni irden Eýranyň howpsuzlyk güýçleriniň bir işgäriniň ýurduň günbataryndaky Kuhdeşt şäherinde gijeki wakalarda öldürilendigini habar berdi.
Ölen adamyň 1979-njy ýyldaky ynkylapdan gysga wagt soň Humeýni tarapyndan döredilen meýletinçi harby gurama bolan Besijiň 21 ýaşly agzasydygy anyklandy.
Luristan welaýatynyň häkiminiň orunbasary Said Pourali Kuhdeştdäki protestlerde zyňylan daşlaryň netijesinde 13 polisiýa işgäriniň we Besijiň agzalarynyň ýaralanandygyny mälim etdi.
Eýranda dartgynlyk ýene-de ýokarlanýar
Prezident Mesud Pezeşkiýan protestçileriň "kanuny talaplaryny" kabul edip we hökümetini ykdysady kynçylyklary çözmäge çagyrmak arkaly dartgynlylygy gowşatmaga synanyşdy.
Resmiler şeýle hem zorluga aýgytly jogap berjekdiklerini mälim etdiler we ykdysady şikaýatlary durnuksyzlyk döretmek üçin ulanmak synanyşyklaryna garşy duýduryş berdiler.
Eýranyň Baş prokurory parahatçylykly ykdysady protestleriň kanunydygyny, ýöne zorluk ulanýanlaryň ýa-da jemgyýetçilik emlägine zeper ýetirýänlere "aýgytly jogabyň" beriljekdigini aýtdy.
Döwlet eýeçiligindäki Tasnim habar agentligi ABŞ-da we Ýewropada "Eýrana garşy" toparlar bilen baglanyşykly diýip öňe sürülen ýedi adamyň tussag edilendigini we protestleri zorlukly hereketlere öwürmekde aýyplanýandyklaryny habar berdi.
Eýranyň walýutasy bolan rial geçen ýylyň dowamynda ABŞ dollarynyň öňünde 1/3 derejede hümmedini ýitirdi; inflýasiýa ilatyň satyn alyş ukybyny pese gaçyrmagyny dowam etdirýär.
