BMG anna güni ABŞ-nyň Kuba goýan nebit embargosy sebäpli ýurtda başdan geçirilýän kynçylyklara uly alada bildirýändigini mälim etdi.
ABŞ-nyň Prezidenti Donald Tramp, geçen aý Kubany nebit bilen üpjün edýän Wenesuelanyň lideri Nikolas Maduronyň Amerikan goşuny tarapyndan zamun alynmagyndan soň Kubany nebitden mahrum etjekdigini mälim edipdi.
BMG-nyň Adam hukuklary boýunça ýokary komisarlygynyň metbugat sekretary Marta Hurtada, Ženewada metbugata beren beýannamasynda, “Onlarça ýyldan bäri dowam edýän söwda embargosy we soňky döwürde ABŞ-nyň goýan nebit embargosy sebäpli Kubada çuňlaşýan ykdysady krizise uly alada bildirýäris. Bu ýagdaý Kubadaky halkyň adam hukuklaryna uly zeper ýetirýär” diýdi.
Marta Hurtada, BMG-nyň Adam hukuklary boýunça ýokary komisary Wolker Türkiň ähli döwletlere bir taraply ýagdaýda pudaklara goýlan çäklendirmeleriň bes edilmegi üçin çagyryş edendigini ýatlatdy.
Hurtada, saglygy goraýşyň, azyk önümleriniň we suw ulgamlarynyň ýangyçlara baglydygy göz öňüne getirlende, Kubadaky nebit ýetmezçiliginiň halkyň şol önümlere bolan elýeterliligi taýdan howpludygyny aýtdy.
1962-nji ýyldan bäri ABŞ-nyň söwda embargosynyň astynda ýaşaýan Kuba, uzak ýyllardan bäri elektrik togynyň kesilmegi we ýangyç, derman we azyk ýetmezçiligi ýaly uly kynçylyklary başdan geçirýär.
Hurtado, Kubanyň halkara adam hukuklaryna laýyklykda waka degişli gaýtawuly görkezmelidigini, dartgynlygyň gowşamagy üçin halkyň söz azatlygyna sarpa goýulmalydygyny belledi.
