Eýranly resmiler, ABŞ-nyň Ýakyn Gündogara harby güýç ornaşdyrmaga dowam edýändigine garamazdan penşenbe güni gepleşikleriň täze tapgyrynyň başlamagyna garaşýar.
Ýekşenbe güni JBS Nýus teleýaýlymyna beýannama beren Eýranyň Daşary işler ministri Abbas Arakçi, Tähranyň ýadro gepleşikleriniň täze tapgyrynyň öňüsyrasynda taslama tekstiň taýarlanýandygyny aýtdy.
Taraplara töwellaçylyk edýän Omanyň Daşary işler ministri Seýid Bedr bin Hamad Al Busaidi, gepleşikleriň penşenbe güni Ženewada gaýtadan başlajakdygyny aýtdy.
Eýranda geçirlen protest ýörişlerinde adam pidalarynyň artmagyndan soň ABŞ-nyň abaý-syýasaty has güýçlendi.
Eýranyň Daşary işler ministri Arakçi, “ABŞ hüjüm eden halatynda özümizi goramak hukugymyz bar” diýdi.
Arakçi ABŞ-nyň sebitdäki harby merkezleriniň nyşana alynyp bilinjekdigini öňe sürdi.
Eýranyň Prezidenti Mesud Pezeşkiýan hem sosial mediadan beren habarnamasynda gepleşikleriň ozalky tapgyryny “oňyn” hökmünde häsiýetlendirdi.
Ženewada geçirlen gepleşikleriň soňky tapgyryndan soň Eýran, harby hüjümiň öňüni aljak ylalaşygyň taslama tekstini taýarlandygyny mälim etdi.
Arakçi JBS-ä beren beýannamasynda “Penşenbe güni Ženewada geçiriljek gepleşiklerde ylalaşyk gazanylyp bilner” diýdi.
Axios amerikaly resmä esaslanýan habarynda, Eýranyň 48 sagadyň dowamynda teklibini hödürlän halatynda Waşingtonyň hepdäniň dowamynda gepleşiklere başlamaga taýardygyny mälim edipdi.
Beýleki tarapdan ABŞ Ýakyn Gündogara harby güýç ornaşdyrmaga dowam edýär.
ABŞ-nyň Prezidenti Donald Trampyň Ýakyn Gündogar boýunça ýörite wekili we gepleşikleri alyp baryjy Witkoff, şenbe güni Fox Nýus teleýaýlymyna beren beýannamasynda prezidentiň Eýranyň näme üçin basyşlara boýun egmeýändigine düşünmeýändigini aýtdy.
