ABŞ Russiýanyň Ukraina bilen bagly güýçli talaplar boýunça egilşiksiz pozisiýasy sebäpli Prezident Donald Tramp bilen Russiýanyň döwlet Ýolbaşçysy Wladimir Putinbiň arasynda Budapeştde geçirilmegi meýilleşdirilen sammiti bes etdi. Bu maglumat “Finansal Taýms” tarapyndan anna güni çap edildi.

Karar iki ýurduň ýokary derejeli diplomatlarynyň arasynda geçirilen dartgynly telefon söhbetdeşliginden soň kabul edildi. Gazet mesele boýunça habarly adamlara salgylanyp bu barasynda maglumat çap etdi.

Ak  Tam bu barasynda henize çenli resmi beýannama bermedi.

Trampyň we Putiniň oktýabr aýynda Budapeştde sammit geçirmek hakyndaky meýilnamalary Moskwanyň talaplarynda egilşik etmezligi sebäpli bes edildi. Şol talaplaryň hatarynda Ukrainanyň atyşygyň şerti hökmünde Russiýa ýer bölegini bermegi hem bardy.

Tramp Ukrainanyň häzirki serhetlerinde atyşygyň dessine bes edilmegi boýunça çagyryşy goldapdy.

Trampyň we Putiniň Russiýanyň Ukrainadaky urşuny bes etmek hakynda pikir alyşmak üçin Wengeriýanyň paýtagty Budapeştde duşuşmak hakynda karara gelmeginden birnäçe gün soň Russiýanyň Daşary işler ministrligi Waşingtona resminama ugratdy. Şol resminamada Putiniň çaknyşygyň “esasy sebäpleri” hökmünde atlandyrýan meselelerinin seljerilmelidigi nygtalýar. Şolaryň hatarynda territorial egilşikler, Ukrainanyň ýaragly güýçleriniň sanynyň azaldylmagy we NATO goşulmajakdygy hakynda kepillik bermegi bardy.  

ABŞ Russiýanyň Daşary işler ministri Sergeý Lawrow bilen ABŞ-nyň döwlet Sekretary Marko Rubionyň arasynda geçirilen telefon söhbetdeşliginden soň sammiti bes etdi. Rubio telefon söhbetdeşliginden soň Trampa Moskwanyň gepleşik üçin isleginiň ýokdugyny beýan etdi. Bu maglumat bolsa “Finansal Taýms” gazetinde çap edildi.

Ukrainanyň Prezidenti Zelenskiý şu aýyň dowamynda beren beýannamasynda Ukrainanyň ýaraşyk gepleşiklerine taýýardygyny, emma Moskwanyň talap edişi ýaly goşmaça ýerlerden goşunlaryny yza çekmejekdigini aýtdy.