Türkiyäniň prezidenti Rejep Taýýip Erdogan Sudanyň Al-Faşir sebitinde bolan gyrgynçylyklary berk tankyt edip, Afrika ýurdunyň territorial bütewiligini we özygtyýarlylygyny goramagyň zerurdygyny nygtady.

Erdogan duşenbe güni Stambulda geçirilen Yslam Hyzmatdaşlyk Guramasynyň (YHG) Ykdysady we Söwda Hyzmatdaşlyk boýunça Hemişelik Komitetiniň (COMCEC) 41-nji mejlisiniň açylyşynda çykyş edip: “Göwresinde daş däl-de, ýürek göterýän hiç kim Al Faşirde asuda ilata gönükdirilen ýakynda bolan gyrgynçylyklary kabul edip bilmez; biz bu barada dymyp bilmeris” diýdi.

Sudanyň territorial bütewiligini, özygtyýarlylygyny we garaşsyzlygyny goramagyň zerurdygyna ünsi çeken Erdogan, Sudanyň halkynyň ýanynda durmagyň möhümdigini nygtady we yslam dünýäsini gan döküşikligi dessine bes etmek üçin jogapkärçiligi öz üstüne almaga çagyrdy.

Prezident Erdogan: “Bu kyn günlerde Sudan halkynyň ýanynda bolmagymyz we ynsanperwer kömegimizi we galkynyş ugrundaky goldawymyzy dowam etdirmegimiz möhümdir” diýdi.

"Ysraýylyň örän erbet delosy bar"

Gaza urşunyň üstünde durup geçen Erdogan Hamas toparynyň ok atyşygy bes etmek baradaky ylalaşyga eýermekde berk tutanýerli görünýändigini, ýöne Ysraýylyň örän erbet görkezijilere eýe bolandygyny aýtdy.

Erdogan Ysraýylyň Gazadaky ýaraşyk ylalaşygyndan bäri 200-den gowrak bigünä adamy gyrandygyny, Günbatar Şeriadaky basyp alyşlygyna we hüjümlerine arakesme bermeýändigini belläp: “Biz Günbatar Şerianyň anneksiýasyna, Iýerusalimiň statusynyň üýtgemegine, ilkinji kyblamyz bolan Al-Aksa metjidiniň mukaddesligine zyýan ýetirjek hiç hili synanyşyga ýol berip bilmeris” diýdi.