Sebitiň gubernatory Wýaçeslaw Gladkow Russiýanyň Belgorod serhet sebitinde Ukrainanyň uçarmansyz howa ulaglarynyň hüjüminde üç adamyň ölendigini aýtdy.
Gladkow sişenbe güni Telegramdan beren beýanatynda: "Ukrainanyň Ýaragly güýçleriniň uçarmansyz howa ulaglarynyň hüjümleriniň netijesinde asuda ilatdan 3 adam öldi we üç adam ýaralandy" diýip belläp, uçarmansyz howa ulaglarynyň bir awtoulagy nyşana alandygyny we bir erkek adamyň ölendigini, şeýle hem başga bir ýerde bir erkek bilen bir aýalyň ölendigini mälim etdi.
Russiýanyň Tuapse şäherindäki nebiti gaýtadan işleýän zawodda ýangyn boldy
Resmileriň aýtmagyna görä, ukrain dronlary Gara deňziň kenaryndaky Russiýanyň Tuapse nebiti gaýtadan işleýän zawodyna hem hüjüm edip, ýangyna sebäp bolupdyr.
Bu hüjüm soňky hepdelerde “Rosneft” kompaniýasynyň nebiti gaýtadan işleýän zawodyna we Tuapse portuna guralan birnäçe uçarmansyz howa ulaglarynyň hüjümleriniň iň soňkusy boldy, hüjümiň netijesinde deňize nebit döküldi we söndürilmegi birnäçe gün dowam etjek ýangyn başlady.
Senagat çeşmeleriniň maglumatyna görä, esasan eksport üçin nebit önümlerini öndürýän nebiti gaýtadan işleýän zawod 16-njy aprelde uçarmansyz howa ulagy bilen guralan hüjümlerden soň işini togtadypdy.
ABŞ-nyň araçylygynda geçirilen parahatçylyk gepleşikleriniň togtadylmagyndan we Waşingtonyň Eýrandaky urşa ünsüni jemlemeginden soň, Ukraina mart aýyndan bäri Russiýa garşy hüjümlerini artdyrdy.
Tuapse nebiti gaýtadan işleýän zawodynyň ýyllyk önümçilik kuwwaty takmynan 12 million metrik tonna ýa-da günde 240000 barrel bolup, ol ýerde nafta, dizel, mazut we wakuum kerosini öndürilýär.
2022-nji ýylyň fewral aýynda Ukraina garşy uruş başladanyndan bäri, Russiýa hem aýratyn möhüm infrastruktura desgalaryny yzygiderli bombalaýar.
Olara jogap hökmünde Kiýew, Russiýadaky nyşanalara hüjüm edýär, Moskwanyň öz uruş tagallalaryny maliýeleşdirmek ukybyny azaltmak üçin harby desgalary, şeýle hem energiýa desgalaryny nyşana alýandygyny öňe sürýär.
