Türkiyäniň kenarynda ýene-de bir tankeriň hüjüme sezewar bolandygy habar berildi
Soňky waka Türkiyäniň kenarynda iki tankere hüjüm guralmagyndan birnäçe gün soň boldy.
Türkiye ýene-de bir tankeriň Gruziýa tarap barýarka Gara deňizde hüjüme sezewar bolandygyny habar berdi.
Sişenbe güni bolan wakada gämidäki adamlaryň hiç birine zeper ýetmedi.
Birnäçe gün mundan ozal bolsa Türkiyäniň kenarynda iki tankere hüjüm guralmagy sebäpli gämilerde partlamalar bolupdy.
Ukrainanyň howpsuzlyk çeşmesi iki gün mundan ozal bolan hüjümleriň jogapkärçiligini öz üstüne aldy we dronlaryň "rus nebitini gizlinlikde daşaýan" gämilere hüjüm gurandygyny aýtdy.
Sişenbe güni irden bolan iň soňky waka “Midwolga 2” atly gämä zeper ýetdi; Türkiyäniň Deňiz işleri boýunça baş müdirligi X-den beren beýanatynda tankeriň "kenardan 80 deňiz mili uzaklykda hüjüme sezewar bolandygyny" habar berdi. Beýanatda şeýle hem tankeriň günebakar ýagy bilen ýüklenendigi, ýüki Russiýadan Gruziýa alyp barýandygy we gäminiň düzüminde 13 adamyň bolandygy habar berildi.
Müdirlik şeýle hem "häzirki wagtda 13 ekipaž agzasynyň arasynda hiç hili ýaramaz ýagdaý bolmadyk gäminiň kömek sorap ýüz tutmandygyny" habar berdi.