Türkiyäniň Energetika we tebigy serişdeler ministri Alparslan Baýraktar Saud Arabystany bilen takmynan 2 milliard dollarlyk energiýa maýa goýum ylalaşygyna gol çekilendigini we bu şertnama giň gerimli gün energiýasy taslamalaryny öz içine alýandygyny habar berdi.
Baýraktar Saud Arabystanynyň paýtagty Riýatda özüniň we Saud Arabystanynly kärdeşiniň Türkiye Respublikasynyň hökümeti bilen Saud Arabystany Patyşalygynyň hökümetiniň arasyndaky gaýtadan dikeldilýän energiýa elektrik stansiýalarynyň taslamalary boýunça hökümetara ylalaşygyna gol çekendigini aýtdy.
Energetika we tebigy serişdeler ministri Baýraktar Saud Arabystanynyň kompaniýalarynyň Türkiyede jemi 5000 megawatt kuwwatly gün we ýel elektrik stansiýalaryny gurjakdygyny mälim etdi.
Maýa goýumyň birinji tapgyry hökmünde Merkezi Anadoludaky Siwas we Karaman welaýatlarynda umumy kuwwaty 2000 megawatt bolan gün elektrik stansiýalarynyň taslamalary durmuşa geçiriler.
Baýraktar: “Biz elektrik energiýasyny Türkiyede öň görülmedik iň pes bahadan satyn alarys. 2000 megawatt kuwwatly bu birinji tapgyr taslamasy takmynan 2 milliard dollar maýa goýum möçberlidir. Bu, şeýle hem, daşary ýurtlardan göni maliýeleşdirmegiň ýurdumyza geljekdigini aňladýar. Munuň bir bölegi ýerli serişdelerden, bir bölegi bolsa halkara maliýe edaralaryndan üpjün ediler” diýdi.
Baýraktar takmynan 2 milliard dollar maýa goýum bilen guruljak gün elektrik stansiýalarynyň takmynan 2,1 million hojalygyň elektrik energiýasyna bolan zerurlyklaryny kanagatlandyrjakdygyny we Türkiyäniň maýa goýum gurşawyna we energiýa pudagyna bolan ynamy görkezýän bu taslamalaryň Prezident Rejep Taýýip Erdoganyň 2035-nji ýyla çenli gün we ýel energiýasynda gurnalan kuwwatlylygy 120 müň megawatta ýetirmek maksadyna laýyklykda edilen iň möhüm ädimleriň birini emele getirýändigini aýtdy.
Ministriň beýanatyna görä, Karamanda guruljak elektrik stansiýasyndan 25 ýyllap kilowatt-sagat üçin 1,995 ýewro, Siwasda guruljak elektrik stansiýasyndan bolsa kilowatt-sagat üçin 2,3415 ýewro bahadan elektrik energiýasy satyn alynar.
Baýraktar taslamalaryň 50 göterimini ýerlileşdirmegi maksat edinýändigini we gurluşygyň 2027-nji ýylda başlanmagyna garaşylýandygyny aýtdy.
Birinji tapgyryň 2027-nji ýylyň ahyryna çenli tamamlanmagy meýilleşdirilýär, taslamanyň dolulygyna bolsa 2028-2029-njy ýyllar aralygynda tamamlanmagy meýilleşdirilýär.
Baýraktar şeýle hem Saud Arabystany bilen Türkiyäniň arasynda elektrik energiýasy pudagynda uzak möhletli hyzmatdaşlygyň, şol sanda elektrik geçirijisi we arabaglanyşyk taslamasynyň ara alnyp maslahatlaşylandygyny habar berdi.
Baýraktar sişenbe güni Prezident Rejep Taýýip Erdoganyň Riýada guran saparyna ýoldaşlyk eden wekiliýetiň düzüminde bolupdy.
