Russiýa şu hepdäniň başynda Gara deňzinde iki nebit tankerine guralan hüjümlerde we Noworossiýsk şäheriniň golaýyndaky möhüm nebit terminalynyň nyşana alynmagynda Ukrainany aýyplady.
Russiýanyň Daşary işler ministrliginiň metbugat wekili Mariýa Zaharowa ýekşenbe güni beren beýanatynda hüjümleri "terrorçylykly hereketler" diýip atlandyrdy we olary bir gün öň gazak nebitini Russiýanyň üsti bilen eksport edýän Hazar turbageçiriji konsorsiumynyň (CPC) infrastrukturasyna guralan hüjüm bilen baglanyşdyrdy.
Kiýew aýyplamalar barada hiç hili beýanat bermedi.
CPC şenbe güni irden sürüjisiz deňiz ulaglarynyň terminalyň bir nokady bolan baglanşdyrma stansiýalarynyň birine hüjüm edendigini, wakadan soň Russiýanyň ýük ýüklemegi we degişli operasiýalary togtatmaga mejbur bolandygyny habar berdi.
Bu wakalar anna güni Noworossiýske tarap barýan iki boş tankerde partlamalaryň bolmagyndan soň ýüze çykdy.
Türk resmiler ekipažy ewakuasiýa etdiler
Türkiyäniň Deňiz işleri boýunça baş müdirligi halas ediş toparlarynyň Türkiyäniň kenaryndan 45 kilometr uzaklykda "daşarky faktor" sebäpli ýangyn bolan KAIROS atly tankeriniň ekipažyny ewakuasiýa edendigini habar berdi.
“WIRAT” atly ikinji gämä bolsa, kenarýakadan takmynan 35 deňiz mili uzaklykda hüjüm guralandygy habar berildi.
Türkiyäniň Ulaglar we infrastruktura ministri Abdulkadir Uralogly partlamalardan soň milli edaralaryň arasynda utgaşykly işleriň alnyp barylýandygyny aýtdy.
Eksporty esasan Noworossiýsk terminalyna bagly bolan Gazagystan ýekşenbe güni resmi protest bildirip, muny "ýene bir maksatly hüjüm" diýip atlandyrdy we Ukrainany mundan beýläk wakalaryň öňüni almaga çagyrdy.
Zaharowa Ukrainanyň metbugatynda ýaýran wideolara salgylanyp, Kiýewiň howpsuzlyk gulluklarynyň "iş ýüzünde gatnaşygyny boýun alandygyny" we Moskwanyň bu hüjümleri dowamly parahatçylygy üpjün etmek üçin halkara tagallalaryna päsgel bermek synanyşygy hökmünde görýändigini aýtdy.
Zaharowa bu wakalaryň sebitde gämi gatnawlarynyň howpsuzlygyna howp salýandygyny aýtdy. Ukraina bolsa henizem Russiýanyň aýyplamalaryna jogap bermedi.
