Yragyň Daşary işler ministri Fuad Hüseýin Türkiyäniň PKK-ny ýaragsyzlandyrmak ugrundaky tagallalaryny goldamaga söz berdi we giň gerimli sebitleýin çözgüdi maksat edinýändiklerini aýtdy.
Yragyň döwlet habarlar agentligi INA-nyň habaryna görä, ministr Hüseýin türk kärdeşi Hakan Fidan bilen bilelikde geçiren metbugat ýygnagynda: “Yrak Türkiye bilen PKK-nyň arasyndaky dialogy goldaýar we ähli taraplary kanagatlandyrýan çözgüdiň tapylmagyna umyt bildirýär” diýdi.
Türkiye, ABŞ we ÝB tarapyndan terrorçylykly gurama diýlip ykrar edilen PKK maý aýynda kongres geçirip, dargadylandygyny yglan etdi. Bu karar onuň lideri Abdullah Öjalanyň fewral aýynda onlarça ýyllap dowam eden hüjümleri bes etmek baradaky çagyryşyndan soň kabul edildi.
Terror guramasy 26-njy oktýabrda Türkiyeden çekilýändigini yglan etdi.
Bagdat-Ankara gatnaşyklaryny "taryhy" diýip atlandyran Hüseýin, Fidan bilen duşuşyklarynda suw meselesiniň hem ara alnyp maslahatlaşylandygyny we munuň iki ýurt üçin hem möhüm we umumy bähbitleri aňladýandygyny aýtdy.
Ministr Yragyň we Türkiýäniň dürli ugurlarda 26 özara düşünişmek baradaky memoranduma eýedigini we ýakyn sagatlarda suw serişdelerini bilelikdäki dolandyrmak çarçuwasy baradaky resminama gol çekiljekdigini belledi.
Türkiye bilen Yragyň arasynda çuňňur taryhy we medeni gatnaşyklar bar, bu gatnaşyklar 2009-njy ýylda Ýokary derejeli strategik hyzmatdaşlyk geňeşiniň döredilmegi bilen has-da pugtalandyryldy. Iki ýurduň arasyndaky söwda ugry hyzmatdaşlygyň esasy ugurlary hökmünde tapawutlanýar.
