Saud Arabystanyň metbugaty bu şertnamanyň iki ýurda doly harby mümkinçiliklerinden peýdalanmaga mümkinçilik berendigini habar berdi, öňki harby işgärleriň biri bolsa NATO-nyň "birine hüjüm edilen halatynda, hemmesine hüjüm edilen ýaly garalmagy baradaky" ýörelgäni görkezýändigini aýtdy.

Saud Arabystanyň köpçülikleýin habar beriş serişdeleri Riýad bilen Yslamabadyň arasynda gol çekilen strategiki goranyş ylalaşygyny iki ýurduň hem doly harby kuwwatyny ulanmaga mümkinçilik berjek "eýmendirme saýawany" hökmünde beýan etdiler.

Çarşenbe güni Saud Arabystanynyň Mirasdar Şazadasy Muhammed bin Salman Riýadda Pakistanyň Premýer-ministri Şahbaz Şerif bilen bu ylalaşyga gol çekdi.

Saud Arabystanynyň resmi habar gullugy SPA tarapyndan çap edilen bilelikdäki beýannamada, bu ylalaşygyň "howpsuzlygy güýçlendirmek, sebitde we dünýäde parahatçylyga goşant goşmak, iki ýurduň arasyndaky goranyş hyzmatdaşlygyny ösdürmek we islendik hüjüme garşy bilelikde goranyşy güýçlendirmek" maksadyny göz öňünde tutýandygy bellenildi.

Ylalaşykda: "Islendik ýurda garşy guralan hüjüm, iki ýurda garşy guralan hüjüm hökmünde kabul ediler" diýip aýdylýar.

Saud Arabystanly resmileriň biri Reýtere beren beýanatynda: “Bu ylalaşyk uzak ýyllardan bäri dowam edip gelýän gepleşikleriň netijesidir. Kesgitli ýurtlara ýa-da waklara jogap hökmünde däl, eýsem iki ýurduň arasyndaky uzak möhletleýin hyzmatdaşlygyň guramalaşdyrylmagydyr” diýip belledi.

Şahsyýetiniň gizlin galmagyny isleýän şol resmi, ylalaşygyň ýadro eýmendirmäni öz içine alyp almandygy bilen bagly soraga: “Bu ylalaşyk ähli harby serişdeleri öz içine alýan giňişleýin goranyş ylalaşygydyr” diýdi.

Saud Arabystanynyň Goranmak ministri Şazada Halid bin Salman, öz resmi X hasabyndan beren beýanatynda: "Saud Arabystany we Pakistan... Islendik duşmana garşy bir front... Hemişe we elmydama" diýip ýazdy.