Ysraýylyň Gaza zolagyna guran soňky hüjümlerinde ýene-de 2 palestinaly öldi, köp sanda adam ýaralandy.

Ysraýylyň goşuny 2025-nji ýylyň 10-njy oktýabryndan bäri sebitde dowam edýän ot açmagy bes etmek baradaky ylalaşygyň düzgünini bozup, hüjümlerini dowam etdirýär.

Şaýatlaryň beren maglumatlaryna görä, Ysraýylyň harby uçarmansyz howa ulaglary Gaza şäheriniň günbataryndaky Senagat köçesi we Senagat çatrygy sebitinde elektrik tokda işleýän welosipedi nyşana aldy.

Hüjüm welosipedçiniň we şol wagt ol ýerden geçip barýan bir raýatyň ölümine sebäp boldy, birnäçe palestinaly ýaralandy.

Hüjümde ýaralanan adamlaryň käbirleriniň ýagdaýy bolsa agyr.

Beýleki tarapdan Gaza zolagynyň günortasyndaky Han Ýunus şäheriniň demirgazygynda ýerleşýän Hamed sebitinde ysraýylly esgerleriň ot açmaklary netijesinde bir aýal ýaralandy.

Gazadaky Saglygy goraýyş ministrliginiň iň soňky ýazmaça beýanatynda 2025-nji ýylyň 10-njy oktýabrynda ot açmagy bes etmek baradaky ylalaşygyň güýje girmeginden bäri Ysraýylyň hüjümlerinde 1534 adamyň ölendigi, 5486 adamyň ýaralanandygy we harabalyklaryň aşagyndan 841 adamyň jesediniň çykarylandygy habar berildi.

Ysraýylyň 2023-nji ýylyň oktýabr aýyndan bäri Gaza zolagyna guran hüjümlerinde umumy adam ýitgisiniň 74 müň 494-e, ýaralananlaryň sanynyň bolsa 175 müň 604-e ýetendigi mälim edildi.