Zelenskiý Abu-Dabide geçirilen gepleşiklerde energiýa meseleleriniň maslahatlaşylandygyny aýtdy
Ukrainanyň Prezidenti Wladimir Zelenskiý BAE-de ara alnyp maslahatlaşylan ylalaşyklaryň durmuşa geçirilmegine garaşylýandygyny we dartgynlylygy azaltmak üçin görülýän çäreleriň urşy bes etmekde hakyky öňegidişlige goşant goşjakdygyny aýtdy.
ABŞ-nyň prezidenti Donald Tramp Russiýanyň prezidenti Wladimir Putin bilen hüjümleri bir hepde togtatmak barada ylalaşyk gazanylandygyny aýdandan soň, Ukrainanyň prezidenti Wladimir Zelenskiý geçen hepde Birleşen Arap Emirliklerinde (BAE) geçirilen üçtaraplaýyn parahatçylyk gepleşiklerinde energiýa bilen bagly ot açmagy bes etmek meseleleriniň ara alnyp maslahatlaşylandygyny aýtdy.
Zelenskiý penşenbe güni X hasabyndan beren beýanatynda, Tramp tarapyndan geçirlen duşuşyklaryň birinde Russiýanyň prezidenti Putinden gyşyň agyr şertlerinde Kiýewe we Ukrainanyň beýleki şäherlerine hüjüm guramazlygy "şahsy taýdan haýyş edendigini" baradaky beýanaty barada beýannama berdi.
Ukrainanyň Prezidenti Zelenskiý Trampa minnetdarlyk bildirip, “Energiýa ýaşaýşyň esasydyr. Biz hyzmatdaşlarymyzyň bize ýaşaýşy goramaga kömek etmek üçin edýän tagallalaryna uly baha berýäris” diýdi.
Zelenskiý şeýle hem: “Toparlarymyz bu meseläni Birleşen Arap Emirliklerinde ara alyp maslahatlaşdylar. Ylalaşyklaryň ýerine ýetirilmegine garaşýarys. Dartgynlylygy azaltmak üçin edilýän ädimler urşuň soňuna çykmakda hakyky öňegidişlige goşant goşýar” diýdi.
Zelenskiý bu tema boýunça başga bir beýanatynda agşam çap eden wideo ýüzlenmesinde "şu gije we geljekki günlerde ýagdaýyň" "işleriň nähili tapgyrdadygyny görkezjekdigini" aýtdy.
Russiýa, Ukraina we ABŞ 23-24-nji ýanwarda Birleşen Arap Emirlikleriniň paýtagty Abu-Dabide iki günlük maslahat geçirdiler. Ýekşenbe güni Abu-Dabide üçtaraplaýyn parahatçylyk gepleşikleriniň täze tapgyrynyň geçirilmegi meýilleşdirilýär.
Rus resmileri mesele bilen bagly entek beýanat bermediler.