Fransiýanyň Prezidenti Emmanuel Makron Yragyň Erbil sebitinde bolan hüjümde seržant Arnaud Frionyň ölendigini tassyklady.

Makron fransuz güýçlerine edilen hüjümi "kabul edilmesiz" diýip häsýetlendirdi, Frionyň bitiren işleri üçin minnetdarlyk bildirdi we Fransiýanyň öz işgärlerini goramak üçin degişli jogap berjekdigine söz berdi.

Resmi çeşmelerden biri terrorçylyga garşy göreş täliminiň dowamynda guralan uçarmansyz howa enjamynyň hüjüminde ýedi fransuz esgeriniň ýaralanandygyny aýtdy.

Kürdistan Awtanomiýasynyň (KA) serkerdesi Şirwan Barzaniniň aýtmagyna görä hüjüm Mahmur sebitindäki bilelikdäki Peşmerga-Fransuz bazasyna edildi.

Dronuň nireden gelendigi barada heniz maglumat ýok.

Barzani ýerli metbugata uçarmansyz howa enjamynyň hüjüminiň fransuz güýçleriniň Peşmerge söweşijilerine geňeşdarlyk edýän harby tälim meýdançasyna urlandygyny aýtdy we: "Ol ýerdäki fransuz esgerleriniň uruş ýa-da çaknyşyk bilen hiç hili baglanyşygy ýok. Olar diňe Yrakda kanuny taýdan bar bolan harby geňeşçilerdir" diýdi.

Barzani wakany "adalatsyz terrorçylyk hereketi" diýip häsýetlendirdi we Yragyň hökümetini şeyle hüjümleriň öňüni almaga çagyrdy.

Erbiliň gubernatory Omed Hoşnaw bolsa hüjümde alty fransuz esgeriniň ýaralanandygyny, olaryň dördüsiniň hassahana ýerleşdirilendigini mälim edipdi.

Hosnaw Yragyň ýerli metbugatyna hüjümiň fransuz güýçleriniň peşmerge güýçleri bilen birlikde ýerleşen Mahmurdaky altynjy bazany nyşana alandygyny we Peşmerge gullukçylarynyň hiç haýsysynyň ýaralanmandygyny sözleriniň üstüne goşdy.