Trendyol 2026 CEV Ýewropa çempionatynyň finalynda Italiýany 3-2 hasabynda utup, çempion bolan Türkiýäniň Milli zenan woleýbol ýygyndysynyň baş tälimçisi Daniele Santarelli we toparyň kapitany Eda Erdem Dündar tomus üçin öňlerinde goýan maksatlarynyň ählisine ýetendiklerini aýtdylar.
Daniele Santarelli bilen Eda Erdem Dündar Sinan Erdem sport toplumynda geçirilen bäsleşikden soň metbugata beýannama berdiler.
Aýdara zadyň köpdügini bellän italiýaly baş tälimçi şeýle diýdi: “Tomusy isleýşimiz ýaly tamamladyk. Ummasyz uly üstünlikler gazandyk. Federasiýamyz we toparymyz hakykatdan-da gutratly işleriň hötdesinden geldi. Şu gün dünýäniň iň güýçli toparlaryndan birine garşy göreşip, meýdançada oýnuň ahyryna çenli göreşdik. Hakykatdan-da ajaýyp netije gazandyk. Şonuň üçin özümize, toparymyza we eden işlerimize buýsanmalydyrys.”
Öz ýurdunyň ýygyndysyna garşy oýnamagy barada hem durup geçen Santarelli: “Men italiýan. Muny hemmäňiz bilýärsiňiz. Emma men Türkiýe üçin işleýärin. Bütün güýjümi Türkiýe üçin sarp edýärin. Bar bolan ähli mümkinçiliklerimi bu toparyň has uly üstünlikler gazanmagy üçin ulanýaryn. Elbetde, meniň Italiýanyň raýatydygymy aýtmagyňyz örän tebigy. Ýöne men bu ýurdy örän gowy görýärin. Bu ýurduň adamlaryny hem örän gowy görýärin. Şu ýurt bilen bilelikde üstünlik gazanmagy, şeýle netijelere ýetmegi örän-örän isleýärin” diýip aýtdy.
Milli zenan woleýbol ýygyndysynyň kapitany Eda Erdem Dündar, tomaşa etmek üçin örän gyzykly oyunlardan birinin oýnalandygyny aýtdy.
Çempion bolandyklary üçin örän buýsançlydyklaryny nygtan Eda Erdem Dündar: “Biz örän bagtly. Topar hökmünde tomsuň başynda öňümizde goýan maksatlarymyzyň ählisine ýetdik. Şu gün hem ajaýyp tomaşaçylar bardy. Tomaşa etmek üçin örän gyzykly we çekeleşikli oýun boldy. Käbir pursatlarda oýnuň depginini ýitiren hem bolsak, tomaşaçylaryň goldawy we bize bolan ynamy bizi täzeden oýna gaýtaryp getirdi. Italiýa garşy 2-1 hasabynda yza galandygynyza garamazdan oýunda 3-2 hasabynda üstün çykdyk. Ikinji gezek Ýewropa çempiony bolandygymyz üçin örän bagtly” diýip belledi.
