Ýekşenbe güni çap edilen habarda, Eýranyň Ormuz bogazyny açmagy we urşu bes etmegi, ýadro gepleşikleriniň bolsa oňky tapgyrda gün tertibine getirilmegini teklip edendigi nygtaldy.
Axios habar saýtynyň berýän habaryna görä, Eýran ýadro maksatnamasy meselesiniň çykgynsyz ýagdaýa gelmeginden soň Pakistan arkaly ABŞ-na teklip hödürledi.
Mesele bilen ýakyndan gyzyklanýan çeşmeler, uranyň kämilleşdirilmegi meselesiniň gün tertibinden wagtlaýyn çykarylmagynyň, gabawyň bes edilmeginiň we deňiz gatnawynyň adaty ýagdaýda başlamagynyň maksat edinilýändigini nygtady.
Teklibe görä ylalaşygyň möhledi uzadylar we yzygiderli ýagdaýa getirler. Ýadro gepleşikleri bolsa bogaz gaýtadan açylandan we çäklendirmeler bes edilenden soň başlar.
Amerikaly resmilerden biri Tähran tarapyndan Ak Tama teklibiň gelendigini emma teklibiň heniz seljerilmändigini aýtdy.
ABŞ-nyň Prezidenti Donald Trampyň şu gün egindeşleri bilen Eýran meselesini ara alyp maslahatlaşmagyna garaşylýar.
Prezident Donald Tramp, Tährana edilýän basyşy artdyrmak üçin Eýranyň portlaryndaky deňiz gabawyny dowam etdirmek isleýändigini aýtdy.
Tramp “içerki basyşlara sezewar bolýan Eýranyň üç güni bar” diýdi.
Eýranyň Daşary işler ministri Abbas Arakçi hepdäniň ahyrynda Pakistanda we Omanda möhüm duşuşyklar geçirdi.
Eýranyň Daşary işler ministriniň şu gün Russiýanyň Prezidenti Wladinir Putin bilen hem duşuşmagyna garaşylýar.
Ak Tamyň metbugat geňeşçisi Oliwia Wales “Bular ynjyk diplomatik gepleşikler. Kartlar ABŞ-nyň elinde” diýdi.
Eýran bilen ABŞ aprel aýynyň 11-12-i aralygynda Yslamabatda gepleşik geçiripdi, emma ylalaşyk gazanylyp bilinmedi.
ABŞ-nyň Prezidenti Donald Tramp 8-nji aprelde gazanylan atyşygyň bes edilmegi baradaky iki hepdelik ylalaşygyň möhlediniň uzadylandygyny habar berdi.
