Gazagystanyň Energetika ministrligi çarşenbe güni beren beýannamasynda, Ukrainanyň geçen aý Hazar turba geçiriji konsersiumynyň (JPJ) Baltika deňizi terminalyna uçarmansyz howa ulagy bilen guran hüjüminden soň, Kaşagan nebit käninden çykarylýan nebitiň bir bölegini Hytaýa ugratjakdygyny mälim etdi.
Ukrainanyň guran hüjüminiň JPJ terminalyna uly zeper ýetirendigi sebäpli Gazagystanyň dekabr aýynda Kaşagandan Hytaýa ilkinji gezek 50 müň metrik tonna çig nebit ugratmagy meýilleşdirýändigi habar berildi.
Dünýäniň çig nebit üpjünçiliginiň 1 göterimini emele getirýän, rus, gazak we amerikaly paýdarlaryndan ybarat bolan JPJ hüjüm sebäpli eksportyny azaltmaga mejbur boldy.
Ukraina awgust aýyndan bäri Russiýanyň energiýa infrastrukturasyny nyşana almaga dowam edýär. Ukrainanyň hüjümleriniň rus goşunyny maliýeleşdirmek üçin serişdeleriň azaldylmagyny maksat edinýändigi nygtalýar.
Ukrainanyň JPJ desgalaryna zeper ýetirmek maksady bilen guran hüjümi Gazagystan we Kreml tarapyndan ýazgaryldy.
Kaşagan nebitiniň esasy bölegi JPJ arkaly Russiýanyň Gara deňizdäki Noworossisk portundaky zeper ýetirlen desga eksport edilýär we ol ýerden hem başga desgalara ugradylýar.
Görülýän çäreler
Gazagystanyň Energetika ministrligi, Ukrainanyň JPJ terminalyna guralan hüjümiň eksportynyň dolulygyna bes edilmegine sebäp bolmandygyny aýtdy.
Ministrlik “Häzir nebiti täzeden paýlamak üçin gyssagly işler amala aşyrylýar. Kaşagan nebitiniň belli bir böleginiň Hytaýa ugradylmagy üçin degişli çäreler görülýär” diýdi.
