Ukrainanyň paýtagtynyň häkimi Kiýewiň ähli etraplarynyň diýen ýaly "giň gerimli" hüjüme sezewar bolandygyny aýtdy. AFP habar agentligi bolsa Russiýanyň infrastruktura hüjümlerini güýçlendirmegi bilen şäheriň merkezinde partlamalaryň bolandygyny habar berdi.
Kiýewiň şäher häkimi Witaliý Kliçko muny "duşmanyň giň gerimli hüjümi" diýip häsýetlendirdi we howa goranyş bölümleriniň hüşgär ýagdaýdadygyny aýan etdi.
Kliçko Telegramdan beren beýanatynda: “Azyndan 11 adam ýaralandy; olaryň bäşisi hassahana äkidildi, olaryň hataryndaky göwreli aýal we erkek adam örän agyr ýagdaýda” diýip belledi.
Kliçko: "Ýylylyk ulgamlarynyň käbir böleklerine zyýan ýetdi" diýip belläp, demirgazyk-gündogar Desnýanskiý etrabyndaky käbir binalaryň wagtlaýynça ýylylyksyz galandygyny nygtady.
Ol şeýle hem, elektrik we suw üpjünçiliginde bökdençlikleriň bolmagynyň mümkindigini aýtdy.
Kiýewiň sebitleýin harby dolanşygynyň başlygy Mykola Kalaşnik anna güni raketalaryň we dronlaryň paýtagtdaky möhüm infrastruktura desgalaryny nyşana alandygyny aýtdy.
Şäheriň harby dolanşygynyň başlygy Timur Tkaçenko sosial mediadan beren beýanatynda: "Ruslar ýaşaýyş jaýlaryna hüjüm guraýarlar. Kiýewiň ähli etraplarynda diýen ýaly köp sanda zeper ýeten köp gatly binalar bar" diýip, ýazdy.
Kliçko Kiýewiň 10 etrabynyň sekizisinde ýangynlaryň ýa-da zeper ýeten jaýlaryň bardygyny we olaryň ählisine gyssagly lukmançylyk kömek toparlarynyň iberilendigini habar berdi.
