Hytaýyň Döwlet geňeşiniň başlygynyň orunbasary Han Çžen ABŞ bilen "hyzmatdaşlyk we dostluk" gatnaşyklaryny ösdürmek hakynda çagyryş etdi. Bu çagyryş Hytaýyň döwlet Başlygy Si Szinpin bilen ABŞ-nyň Prezidenti Donald Trampyň Koreýa Respublikasynda geçirilmegi meýilleşdirilýän duşuşygynyň öň ýanynda berildi.

Han döwlet eýeçiligindäki “CGTN” habar teleýaýlymyna beren beýanatynda iki ýurduň "hyzmatdaş we dost" bolup biljekdigini aýtdy. Iki ýurduň giňiş umumy bähbitleriniň bardygyny we hyzmatdaşlyk üçin geljekden umytlydygyny nygtap geçdi.

Han bu beýanaty ABŞ-nyň Oregon ştatynyň Senatynyň Başlygy Rob Wagner bilen geçirilen duşuşygynda berdi.

Han ABŞ bilen "özara hormat goýmak, parahatçylykly şertlerde bilelikde ýaşamak we iki tarap üçin bähbitli hyzmatdaşlyk" esasynda işleşmegi arzuw edýändigini aýtdy. Şeýle hem, dünýäniň iň güýçli iki ykdysadyýetiniň täze eýýamda özara gatnaşygy üçin "dogry ýoly" bilelikde tapmagyň möhümdigini nygtady.

Han Wagneriň we onuň kärdeşleriniň iki ýurduň arasyndaky aragatnaşyklary dowam etdirjekdigine, halklaryň arasyndaky gatnaşyklary çuňlaşdyrjakdygyna we Hytaý bilen ABŞ-nyň halkara derejesindäki hyzmatdaşlygyny ösdürmekde görelde görkezjekdigine umyt bildirdi.

Wagner bolsa öz gezeginde halkara derejede hyzmatdaşlygyň ähmiýetini nygtady we Oregon ştatynyň Hytaý bilen "dostlukly hyzmatdaşlygyny" güýçlendirmek üçin kanun taslasyny kabul edendigini aýtdy.