Prezident Rejep Taýýip Erdogan Gazada iş alyp barjak halkara iş toparyny döretmek baradaky gepleşikleriň dowam edýändigini we jikme-jiklikleriň henizem anyklaşdyrylýandygyny aýtdy.

Erdogan anna güni Kuweýt, Katar we Oman döwletlerine guran saparyndan gaýdyşyn uçarda žurnalistlere beýanat berdi. Erdogan: "Bu köp gatlakly mesele bolany üçin, giňişleýin gepleşikler geçirilýär. Biz bu meselede Gaza ähli goldawlary bermäge taýýar. Infrastruktura işlerimiz häzirki wagtda dowam edýär" diýip habar berdi.

Türkiye Gazany durnuklaşdyrmak we durnuksyz ýaraşyk baradaky ylalaşygyň dowam etmegini üpjün etmek üçin halkara tagallalaryny artdyrmaga synanyşýar.

Erdogan şeýle diýdi: "Hamas tarapy ok atyşlygy bes etmek baradaky şertnamany berjaý edýär. Aslynda, olar bu meselede öz tutanýerliliklerini açyk beýan etdiler. Emma Ysraýyl ok atyşlygy bes etmek baradaky şertnamany bozmagyny dowam etdirýär. Halkara jemgyýetçiligi, esasanam ABŞ, Ysraýylyň ok atyşlygy we ylalaşygy doly berjaý etmegini üpjün etmek üçin has köp tagalla etmeli" diýip beyan etdi.

Erdogan bu tapgyrda Ysraýyla ýeterlik diplomatik basyş etmegiň zerurdygyny aýtdy we sanksiýalaryň we ýarag satuwynyň togtadylmagynyň Ysraýyly öz borçnamalaryny ýerine ýetirmäge mejbur edip biljekdigini belledi.