Ukrainanyň prezidenti Wladimir Zelenskiý Kiýewiň ABŞ-nyň prezidenti Donald Tramp bilen ýakyn wagtda boljak duşuşygyna taýýarlyk işlerini tamamlandygyny aýtdy. Zelenskiý gün tertibiniň Russiýa bilen urşy bes etmegine kömek edip biljek harby we ykdysady elementleri öz içine alýandygyny aýtdy.

Zelenskiý çarşenbe güni agşam eden çykyşynda: "Prezident Tramp bilen (17-nji oktýabr) duşuşygyň öňüsyrasynda harby we ykdysady komponentler bilen baglanyşykly bölegimizi taýýarladyk. Her jikme-jiklik, hemme zat taýýar. ABŞ-nyň prezidenti bilen duşuşygymyzyň gün tertibi gaty giňişleýin" diýdi.

Taýýarlyk işlerine goşant goşanlara minnetdarlyk bildiren Zelenskiý bu gepleşikleriň "urşy hakykatdanam bes etmegine has ýakynlaşdyryp biljekdigini" aýtdy we "Şeýle global täsire eýe bolan ýurt ABŞ-dyr we bu tagallada dünýäniň beýleki ýurtlarynyň biziň bilen durmagyny üpjün etmek üçin elimizden gelenini edýäris" diýdi.

Zelenskiý premýer-ministrden, prezident edarasynyň ýolbaşçysyndan we beýleki ýokary wezipeli adamlardan ybarat ukrain delegasiýasynyň duşuşygyň esasyny taýýarlamak we ABŞ-nyň goranmak we energiýa kompaniýalary bilen gepleşikler geçirmek üçin Waşingtonda sapar gurandyklaryny aýtdy.