ABŞ-nyň prezidenti Donald Tramp Eýrana garşy çäklendirilen hüjümi göz öňünde tutýandygyny aýdandan soň, resmi Tähran duşenbe güni Amerikanyň islendik hüjüminiň, hatda çäklendirilen hüjüminiň hem "agressiýa hereketi" hökmünde kabul ediljekdigini we garşylyk görkezmäge sebäp boljakdygyny aýan etdi.
Eýranyň Daşary işler ministrliginiň metbugat geňeşçisi Ismail Bekaýi: "Meniň pikirimçe, çäkli hüjüm diýen zat ýok. Agressiýa hereketi agressiýa hereketi hökmünde kabul ediler. Şolar ýaly. Islendik döwlet, öz-özüni goramak hukugynyň çäginde, agressiýa hereketine berk garşylyk görkezer; biz hem şeýle ederis" diýdi.
ABŞ-nyň harby güýçleriniň Ýakyn Gündogarda köpelmeginden soň, ABŞ-nyň Eýrana garşy harby hereketler bilen bagly hemleleri artdy.
Eýranyň daşary işler ministri Abbas Arakçi ýekşenbe güni CBS News teleýaýlymyna beren interwýusynda Amerikanyň sebitdäki bähbitleriniň mümkin bolan nyşana bolup biljekdigini yşarat edip: "Eger ABŞ bize hüjüm etse, onda biziň özümizi goramaga doly hukugymyz bar" diýip, şol bir wagtyň özünde "diplomatik çözgüt tapmagyň mümkinçiliginiň ýokarydygyny" aýtdy.
Eýranyň prezidenti Mesud Pezeşkiýan hem sosial mediadan beren beýanatynda amerikan tarapy bilen öňki duşuşyklaryň "ruhlandyryjy alamatlary" özünde jemleýändigini aýtdy.
Ženewada geçirilen soňky gepleşiklerden soň, Eýran harby interwensiýanyň öňüni aljak ylalaşyk üçin taslama teklibini taýýarlandygyny beýan etdi.
ABŞ soňky hepdelerde Ýakyn Gündogara iki sany uçargöter gämisini, şeýle hem reaktiw uçarlary we gämileri iberdi we şol bir wagtyň özünde howplara garşy sebitdäki howa goranyşyny güýçlendirdi.
