Ysraýyl Gazadaky genosidinde 100 müňden gowrak palestinalyny öldüren bolup biler
Bilermenler genosidiň dowamynda 112069 palestinalynyň öldürilendigini çaklaýarlar, bu görkeziji Gazadaky resmileriň resmi sanlaryndan has ýokarydyr.
Germaniýanyň hepdelik ZEIT gazetiniň habaryna görä, Ysraýylyň Gazadaky genosidinde öldürilen palestinalylaryň sany öň pikir edilýäninden has köp bolup biler.
Germaniýanyň Rostok şäherinde ýerleşýän Maks Plank adyndaky ilat barlaglary institutynyň ylmy toparynyň hasaplamalaryna görä, iki ýyldan gowrak wagt bäri dowam edýän bu genosid urşunda azyndan 100 müň adam öldürilipdir.
Taslamanyň ýolbaşçylarynyň biri bolan Irena Çen: "Ölenleriň takyk sanyny hiç haçan bilmeris. Biz diňe ähtimal möçberini mümkin boldugyça takyk kesgitlemäge synanyşýarys" diýip nygtady.
Bilermenler ilkinji iki ýylda gabaw astyndaky Gazada bolan gyrgynçylykda ölen ýa-da öldürlen adamlaryň sanynyň 99997 bilen 125915 aralygynda bolandygyny çaklaýarlar. Barlagçylar bolsa 112069 diýip çaklaýarlar.
Maks Plankyň alymlary biri-birinden tapawutly çeşmelerden maglumatlary jemläp, statistiki çaklamalary taýýarladylar. Gazanyň Saglygy goraýyş ministrligi tarapyndan berlen garaşsyz sowalnamalar we jemgyýetçilik mediadaky ölüm görkezijileri hem taslama goşuldy.
Şu wagta çenli ölenleriň sany barada ýeke-täk resmi çeşme Gazadaky Saglygy goraýyş ministrligi bolup, ol genosid urşunyň ilkinji iki ýylynda 67173 adamyň ölendigini habar berdi.
ZEIT-iň maglumatlaryna görä, statistik manipulýasiýa barada hiç hili subutnama ýok.