Eýranyň döwlet metbugatynyň habaryna görä, Eýranyň Bilermenler mejlisi Mojtaba Hameneýini kakasy Ali Hameneýiniň ýerine ýurduň täze dini lideri edip belledi.
Ynkylap goragçylary bilen ýakyn gatnaşyga eýe bolan we orta derejeli ruhany hökmünde tanalýan Mojtaba Hameneýi Eýranyň käbir resmileri tarapyndan ABŞ-nyň we Ysraýylyň Eýrana garşy guran hüjümlerinde öldürilen kakasynyň mirasdüşeri hökmünde eýýäm uzak wagtdan bäri görülýärdi.
Eýranyň häkimiýet ideologiýasy mirasdüşerlik ýörelgelerine garşy bolsada, Mojtaba Hameneýi Ynkylap goragçylarynyň içinde we onuň merhum kakasynyň eýeleýän täsirli wezipesinde güýçli goldawa eýedir.
Bilermenler mejlisi 56 ýaşly Mojtaba Hameneýiniň "Bilermenler mejlisiniň hormatly wekilleriniň çürt-kesik karary bilen Eýran Yslam Respublikasynyň mukaddes ulgamynyň üçünji lideri hökmünde bellenendigini we tanyşdyrylandygyny" yglan etdi.
Beýanatda din adamlary geňeşiniň "jenaýatçy Amerikanyň we zalym sionist režimiň rehimsiz agressiýasyna" garamazdan, täze lideri saýlamakda "bir minut hem ikirjiňlenmändigi" aýdylýar.
Hemle atmak
Bu karar ABŞ-nyň prezidenti Donald Trampyň ozal Mojtabanyň "ähmiýetsizdigini" we Eýrana kimiň ýolbaşçylyk etmelidigini özüniň çözmelidigini aýdanyndan soň kabul edildi.
Bu karar yglan edilmezden öň, Tramp ABC News-a: "Eger biziň razylygymyzy almasa, ol wezipesinde uzak wagtlap galyp bilmez" diýdi.
Eýranyň Ýokary Milli Howpsuzlyk Geňeşiniň sekretary Ali Larijani häzirki dartgynly şertlerde Mojtabanyň ýurda ýolbaşçylyk edip biljekdigini aýtdy we täze dini lideriň töwereginde jebisleşmäge çagyrdy.
Eýranyň Ynkylap goragçylary hem täze dini lideriň yzyna eýermäge taýýardygyny mälim etdi.
