Ermenistanyň Premýer-ministri Nikol Paşinýan öz ýurdunyň goňşy Azerbaýjan bilen ylalaşan parahatçylyk şertnamasynyň taslamasyna gol çekmäge taýyndygyny mälim etdi.
“Ermenistan bilen Azerbaýjanyň arasynda ylalaşylan şertnamanyň taslamasy taýýar we gol çekilmegine garaşýar. Men bu ylalaşygyň taslamasyna gol çekmäge taýyn” diýip, Paşinýan çarşenbe güni X platformasy arkaly beren habarnamasynda mälim etdi.
Paşinýan bu beýanaty geçen hepde Azerbaýjan bilen Ermenistanyň ýaraşyk şertnamasynyň taslamasy boýunça ylalaşyga gelendiklerini yglan etmeklerinden berildi. Bu şertnama onlarça ýyl dowam eden konfliktiň çözülmegini we Baku bilen Ýerewanyň arasynda diplomatik gatnaşyklaryň ýola goýulmagyny maksat edinýär.
Ozalky iki Sowet respublikasynyň arasyndaky gatnaşyklar 1991-nji ýyldan bäri dartgynly dowam edýärdi. Şol ýyl Ermenistanyň harbylary halkara derejesinde Azerbaýjanyň bir bölegi hökmünde ykrar edilýän Garabagy we onuň töweregindäki ýedi sebiti basyp alypdy.
2020-nji ýylyň güýzünde 44 gün dowam eden uruşda Azerbaýjan şol ýerleriň esasy bölegini azat etdi. Bu uruş Russiýanyň töwellaçylyk etmeginde baglaşylan ýaraşyk şertnamasy bilen tamamlandy we şertnama gatnaşyklaryň kadalaşdyrylmagyna hem-de serhetleriň kesgitlenmegine şert döretdi.
Azerbaýjan 2023-nji ýylyň sentýabr aýynda Garabagda doly özygtyýarlylygyny dikeldip, sebitdäki separatist güýçleriň boýun egmeginden soňra doly gözegçiligi ýola goýdy.
