Russiýanyň daşary işler ministri Sergeý Lawrow ABŞ-nyň Nikolas Madurony agdarmak üçin bikanun operasiýa geçirmek we Eýrana hüjüm etmek bilen haýbat atmak arkaly Waşingtonyň döretmäge kömek eden halkara ulgamyny ýok edýändigini aýtdy.
Lawrow çarşenbe güni ABŞ-nyň Madurony zamun almak boýunça geçiren operasiýasy barada: "Bu halkara hukugynyň aç-açan bozulmasydyr" diýip belläp, Russiýanyň ýarany Wenesuela bilen baglaşan ylalaşyklaryna ygrarly galýandygyny beýan etdi.
Lawrow ABŞ-nyň uzak wagtlap goldap gelen ýörelgelerinden ýüz öwürmeginiň öz abraýyna zyýan ýetirýändigini öňe sürüp, Moskwada Namibiýaly kärdeşi bilen geçiren metbugat ýygnagynda: "Amerikan kärdeşlerimiz şeýle hereket eden mahallary, olar ynamsyz bolup görünýärler" diýdi.
Bloombergiň Trampyň ýörite wekili Stiw Witkoffyň we onuň giýewisi Jared Kuşneriň Russiýanyň prezidenti Wladimir Putin bilen duşuşmak üçin Moskwa gelmegi meýilleşdirýändigi bilen bagly soragyna Lawrow, Putiniň Ukrainada parahatçylygy ýola goýmak boýunça çynlakaý gepleşiklere açykdygyny birnäçe gezek mälim edendigini aýtdy.
Lawrow şeýle hem Waşingtonyň Ukraina üçin iň soňky parahatçylyk teklipleri barada Moskwany habarly etmeginiň peýdaly boljakdygyny aýtdy.
