Ysraýylyň Siriýa guran hüjüminde 12 adam ýogaldy

Siriýanyň köpçülikleýin habar beriş serişdeleriniň berýän habaryna görä, Ysraýylyň paýtagt Damaskyň Beýt Jin we Mazrat Beýt Jin ugrunda Juma güni ir ertir guran hüjüminde azyndan 13 adam ýogaldy. Zenanlar we çagalar bilen birlikde köp sanly adam hem ýaralandy.

Anadoly habarlar gullugynyň ýerli çeşmelere esaslanýan habarynda, hüjümlerde iki zenan we bir çaga bilen birlikde jemi 13 adamyň ýogalandygy nygtaldy.

Alikhbaria kanaly hüjümden soň esasan iki etrapçany birleşdirýän ýolda Ysraýyla degişli uçarmansyz howa ulaglarynyň uçmaga dowam edendigini habar berdi.

Siriýanyň resmi habarlar gullugy SANA, Ysraýylyň hüjümlerinden soň iki tiz kömek ulagynyň ýogalanlary almak we ýaralananlary bejermek maksady bilen sebite gidendigini mälim etdi.

Habarda hüjümden soň onlarça maşgalanyň Beýt Jinden has howpsuz ýere gitmek üçin goňşy sebitlere gaçandygy nygtaldy.

Habarda Ysraýylyň howpsuzlyk güýçleriniň etrapçada ilki ýerli halk bilen çaknyşandygy bellenildi.

Ysraýylyň harby goşuny tarapyndan berlen beýannamada, operasiýada ysraýylly 6 esgeriň ýaralanandygy we ýaralananlardan 3-niň ýagdaýynyň agyrdygy nygtaldy.

Siriýaly resmiler tarapyndan Ysraýylyň hüjümi hakynda heniz hiç hili beýannama berilmedi.

Ysraýylyň harby goşuny noýabr aýynda Siriýanyň günortasyna 47 hüjüm gurady.

Ysraýylyň harby goşunynyň 2024-nji ýylyň dekabr aýyndan bäri Siriýa müňden gowrak howa hüjümini gurandygy bellenildi.

Ysraýyl Başar Asadyň 2024-nji ýylyň ahyrynda wezipesinden çetleşdirilmeginden soň 1974-nji ýylda Siriýa bilen baglaşylan şertnamany basgylady we araçäk zolagy ele geçirdi we Siriýanyň Golan depelerindäki basyp alyşlygynyň göwrümini giňeltdi.