Ermenistan Türkiyäniň Agry dagynyň şekilini pasport möhürlerinden aýyrdy
Türkiye Respublikasy bilen Ermenistanyň arasyndaky serhet 100 ýyldan gowrak mundan ozal, 1921-nji ýylda Kars Şertnamasy bilen kesgitlenilipdi.
Ermenistanyň hökümeti Agry dagynyň şekilini ýurda girmek we çykmak üçin ulanylýan pasport möhürlerinden aýyrmak barada karara geldi.
Ýerli metbugatyň habaryna görä, Agry dagynyň nyşany bolan möhürler 2025-nji ýylyň 1-nji noýabryndan başlap ulanylmaz.
Agry dagy Türkiyäniň Ermenistan serhedine ýakyn sebitde ýerleşýär.
Ermenistanyň Zähmet we Durmuş işleri ministri Arsen Torosýan merkezi ABŞ-da ýerleşýän sosial media platformasy X hasabyndan beren beýanatynda, täzelenen möhürleriň diňe serhet geçelgesi baradaky maglumatlary öz düzüminde jemlejekdigini, goşmaça wizuallary öz içine almajakdygyny aýtdy. Torosýan, şeýle hem bu tejribäniň köp ýurtlaryň alyp barýan çemeleşmesi bolandygyny aýtdy.
Ermeni resmiler serhet geçelgelerinde ulanylýan pasport möhürlerinden Agry dagynyň şekilini aýyrmak baradaky karary, goňşy ýurtlara howply ýüzlenmeler bermekden gaça durmak maksady bilen kabul edendiklerini beýan etdiler.