Prezident Donald Tramp ýekşenbe güni özüniň üçünji möhlet prezident bolmak üçin ýol gözleýändigini we onuň "degişip aýdan sözi däldigini" belledi. Bu onuň 2029-njy ýylyň başynda ikinji möhleti tamamlanandan soň, ýurdy dolandyrmagy dowam etdirmek üçin konstitusiýa päsgelçiligini aşmagyň ýollaryny göz öňünde tutýandygyny görkezýän iň açyk bellik boldy.

Tramp NBC News telewideniýe kanaly bilen telefon arkaly geçiren söhbetdeşliginde: “Muňa ýetmek üçin ulanyp boljak usullar bar” diýip aýtdy.

Şeýle hem ol: “Bu barada pikirlenmek üçin entek örän ir” diýip belledi.

1951-nji ýylda konstitusiýa girizilen 22-nji üýtgeşme, Prezident Franklin D. Ruzweltiň yzly-yzyna dört gezek saýlanmagyndan soň kabul edilipdi we onda "Hiç bir adam Prezident wezipesine iki gezekden köp saýlanyp bilmez" diýilýär.

NBC News habarçysy Kristen Uelker Trampa bolmagy ähtimal strategiýanyň Wise-prezident J.D. Wensiň dalaşgär bolup saýlananyndan soň, wezipäni oňa berip-bermejekdigi barada sorag berildi.

Tramp: “Bu bir usul. Emma başga ýollar hem bar. Başga ýollar hem bar” diýip nygtady.

Uelkeriň: “Maňa başga bir ýol barada gürrüň berip bilersiňizmi?” soragyna, Tramp: “Ýok” diýip jogap berdi.

Tramp, ozal hem üçünji möhlet üçin prezident bolmak barada wagtal-wagtal degişme görnüşinde beýanat berýärdi.

Ýanwar aýynda bolsa: “Ýaňadandan dalaşgär bolmagym üçin rugsat barmy?” diýip sorap, şol meseläni ýaňadandan gün tertibe getiripdi.