Ankarada geçirilýän maslahat mynasybetli, Daşary işler ministri Hakan Fidan Gazagystanyň Daşary işler ministri Ýermek Koşerbaýew bilen duşuşdy.
Maslahatda Fidan söwda, ykdysadyýet, maýa goýumlary, energetika, ulag, goranyş senagaty, bilim we ynsanperwer-medeni ulgamlar başda bolmak bilen, hyzmatdaşlygy has-da ösdürmek üçin edilmeli ädimleri ara alyp maslahatlaşar.
Şol çäkde, Gazagystan tarapy bilen iki ýurduň prezidentleriniň kesgitlän 15 milliard dollarlyk söwda dolanşygy maksadyna ýetmek üçin durmuşa geçirilip bilinjek işlere baha berler.
Ministr Fidan, şeýle hem Türki Döwletleriň Guramasy (TDG) başda bolmak bilen, köptaraplaýyn platformalarda hyzmatdaşlygy güýçlendirmegiň ähmiýetini beýan eder.
Hazar deňziniň üsti bilen geçýän Gündogar-Günbatar Orta Koridor başda bolmak bilen, arabaglanyşygy we logistik düzümi güýçlendirmegiň ähmiýetini tassyklajak maslahatda, Fidanyň we Koşerbaýewiň Owganystan, Eýran we Palestina meselesi bilen birlikde, häzirki wagtda bolup geçýän wakalar barada pikir alyşmaklaryna garaşylýar.
Türkiye-Gazagystan Gatnaşyklary
Türkiye-Gazagystan gatnaşyklary ikitaraplaýyn derejede, Ýokary Derejeli Strategik Hyzmatdaşlyk Geňeşi, Bilelikdäki Strategik Meýilleşdiriş Topary, Bilelikdäki Ykdysady Komissiýa we syýasy maslahatlaşma mehanizmalary arkaly netijeli we yzygiderli görnüşde dolandyrylýar.
Ady agzalan mehanizmleriň iň başynda duran Türkiye-Gazagystan ÝDSHG-nyň Bäşinji Maslahaty, Prezident Rejep Taýýyp Erdoganyň we Gazagystanyň Prezidenti Kasym-Jomart Tokaýewiň başlyklyk etmeginde 2025-nji ýylyň 29-njy iýulynda Ankarada geçirilipdi.
ÝDSHG maslahatynyň dowamynda iki prezident tarapyndan "bilelikdäki beýannama" we "ÝDSHG Karary" resminamalaryna gol çekilipdi. Bu resminamalar bilen birlikde bilim, energetika, magdançylyk, ulag, aragatnaşyk, bank ulgamy, erkin ykdysady zolaklar, emeli intellekt we kosmos, ylym we tehnologiýa, derman we lukmançylyk enjamlary, saglygy goraýyş, şäher gurluşygy we adalat ulgamlarynda jemi 20 sany hyzmatdaşlyk şertnamasy baglaşylypdy.
Gazagystan Türkiyäniň Merkezi Aziýadaky iň uly söwda hyzmatdaşydyr. Iki ýurduň arasyndaky umumy söwda dolanşygy 2025-nji ýylyň ýanwar-noýabr aýlaryna çenli 8,95 milliard dollar boldy.
Häzirki wagtda Türk maýasyna esaslanýan 3 müňden gowrak kompaniýa we kärhana Gazagystanyň ykdysadyýetiniň dürli pudaklarynda iş alyp barýar. Gazagystandaky türk telekeçileri esasan azyk sektory, magdançylyk, oba hojalygy, derman-himiýa senagaty, gurluşyk, myhmanhana dolandyryşy we önümçilik ulgamlarynda öňe saýlanýarlar.
Gazagystan Türkiyäniň nebit import edýän ýurtlarynyň arasynda Russiýa we Yrakdan soňra üçünji uly üpjünçidir. Türkiye bilen Gazagystanyň arasyndaky energetika ulgamyndaky hyzmatdaşlykda esasan nebit, tebigy gaz, gaýtadan işlenýän energiýa we logistika/energiýa daşalmagy ýaly ugurlar öňe çykýar.
Türkiye Gazagystanyň ykdysadyýetinde energiýadan daşary pudaklarda iň uly maýa goýujy ýurtlaryň biridir. 2025-nji ýyla çenli Türkiyeden Gazagystana goýlan maýa goýumlaryň mukdary 5,8 milliard dollar töweregi boldy.
