Indoneziýanyň Günbatar Ýawa welaýatynyň Bekasi şäherinde bolan otly heläkçiliginde ýogalanlaryň sany 14 adama, ýaralananlaryň sany bolsa 84 adama ýetdi. Döwlet metbugaty sişenbe güni resmilere salgylanyp, munuň soňky ýyllarda bolan iň uly demir ýol heläkçilikleriniň biri bolandygyny habar berdi.
“Antara” habarlar agentliginiň maglumatyna görä, heläkçilik duşenbe güni agşam Gündogar Bekasi bekedinde şäheriçi otly bilen uzak aralyga gatnaýan otlynyň çakyşmagy sebäpli boldy.
PT Kereta Api Indonesia (KAI) atly döwlet eýeçiligindäki demir ýol kärhanasynyň resmileri onlarça ýaralanan ýolagçynyň dürli hassahanalarda bejergi astyna alynandygyny habar berdiler.
“Jakarta Globe” gazetiniň habaryna görä, KAI-nyň metbugat wekili Franoto Wibowo wakanyň Bekasidäki Bulak Kapal demir ýol geçelgesinde taksiniň elektrikli ýolagçy otlusy bilen çakyşmagy sebäpli başlandygyny aýtdy.
Wakadan soň, şäheriçi gatnaýan otly relslerde durup galdy we gysga wagtdan soň, şol bir liniýada uzak aralyga gatnaýan otly duran şäheriçi otla süsdi. Milli gözleg we halas ediş agentligi (Basarnas) ýaly adatdan daşary ýagdaýlara jogap beriş toparlary gijäniň dowamynda adamlary halas etmek üçin iş alyp bardylar, olaryň käbirine ýöriteleşdirilen lukmançylyk kömegi berildi.
Resmiler ýogalanlaryň şahsyýetini anyklamak üçin polisiýa degişli hassahanalara äkidilendigini aýtdylar.
Resmiler ýogalan adamlaryň ähli lukmançylyk we jaýlama çykdajylarynyň beriljekdigini, şeýle hem maşgalalara kömek bermek üçin gyssagly kömek merkeziniň we maglumat nokatlarynyň döredilendigini aýan etdiler.
Indoneziýanyň ulag pudagynyň resmileri galyndylary aýyrmak we halas ediş işleriniň dowam edýändigini habar berdiler.
