Türkiye ilkinji gezek öz gipersonik raketasy Taýfun Blok-4-i tanyşdyrdy. Bu täze raketa, Stambulda geçirilen IDEF 2025 halkara goranyş sergisinde Roketsan tarapyndan hödürlenen alty sany döwrebap ulgamyň biri boldy.
Tayfun Blok-4 gipersonik ballistik raketasy, Türkiyäniň iň uzak aralyga ýetýän milli görnüşde öndürilen ballistik raketasy bolan Taýfun raketasynyň gipersonik görnüşidir.
Roketsan sişenbe güni beren beýanatynda: “Tayfun Blok-4 uzak aralyklara ýetip, Türkiyäniň goranyş senagatynda täze rekord goýýar. Agramy 7 tonnadan gowrak bolan Taýfun, köp maksatly boýegolowkasynyň saýasynda howa goranyş ulgamlary, ştab merkezlerini, harby angarlary we möhüm ähmiýete eýe bolan harby desgalar ýaly strategik nyşanalary ençeme kilometr uzaklykdan ýok edip bilmek mümkinçiligine eýedir” diýip belledi.
IDEF 2025-de sergilenen türk raketalar we ulgamlar:
Atmaja raketasy, Gökbora howadan howa raketasy, Eren dolanýan ok-däri, 300 Är ballistik raketa, Şimşek-2 emeli-hemra uçuryş enjamy.
Sişenbe güni başlanan alty günlük IDEF goranyş sergisi, Stambul Sergi Merkezi, Atatürk howa menzili, WOW Oteli we Ataköý Marinasynda şol bir wagtda geçirilýär.
KFA Sergi Çäreleri tarapyndan Türkiye Respublikasynyň Goranyş Senagaty edarasy we Türkiyäniň Ýaragly Güýçleriniň Güýçlendirme gaznasy tarapyndan goldanylýan çäräniň global aragatnaşyk hyzmatdaşlarynyň arasynda TRT we Anadoly habarlar agentligi hem bar.
17-nji gezek geçirilýän bu çärä 103 ýurtdan ministrler, baş ştabyň başlyklary, serkerdeler we ýokary derejeli wekiller gatnaşýar, sergide 44 ýurt öz stendlerini açýar.
Bu çärede 900-den gowrak ýerli we 400-den gowrak daşary ýurt goranyş kärhanalary gatnaşýar.
