Türkiyäniň Goranmak Senagaty edarasynyň başlygy Haluk Görgüniň aýtmagyna görä, Türkiyäniň goranmak we awiasiýa eksporty ýanwar-noýabr aýlary aralygynda geçen ýylyň degişli döwrüne garanyňda 30 göterim artyp, rekord derejä, ýagny 7,4 milliard dollara ýetdi.
Görgün penşenbe güni Türkiyäniň NSosyal sosial media platformasynda goranmak we awiasiýa eksportynyň 2025-nji ýylyň noýabr aýynda 747 million dollara ýetendigini, bu bolsa geçen ýylyň degişli döwri bilen deňeşdirilende 22 göterim artandygyny aýan etdi.
Görgün: "Bu depgin bilen pudagymyz diňe noýabr aýyndaky ösüş bilen däl, eýsem ýylyň dowamyndaky görkezijileri bilen hem täze rekord goýdy. Bary-ýogy 11 aýyň dowamynda gazanan eksport görkezijilerimiz ýyllyk esasda ähli wagtlaryň iň ýokary derejelerinden geçdi" diýdi.
Görgün bu görkeziji bilen pudagyň ýokary goşmaça gymmatly önümleriň durnukly ösüşini saklaýandygyny, eksport möçberlerini giňeldendigini we dünýä bazarlarynda bäsdeşlige ukyplylygyny has-da ýokarlandyrandygyny belledi.
Görgün Goranmak Senagaty edarasynyň maksadynyň eksport edýän kärhanalaryň sanyny köpeltmek, kiçi we orta ululykdaky kärhanalary global üpjünçilik zynjyrlaryna goşmak we durnukly, ýokary goşmaça gymmatlykly eksport modelini ösdürmekdigini aýtdy.
Türkiyäniň Goranmak Senagaty edarasynyň başlygy Haluk Görgün: “Türkiye goranyş senagatyny öndürýän, ösdürýän we eksport edýän güýçli ekosistema bilen öz ýoluny tutanýerlilik bilen dowam etdirýär” diýip, belledi.
Penşenbe güni irden yglan edilen umumy eksport maglumatlaryna görä, Türkiyäniň eksporty noýabr aýynda geçen ýylyň degişli döwrüne garanyňda 2,2 göterim artyp, 22,7 milliard dollara ýetdi.
