Russiýa bilen Hytaý, sebitara dartgynlygyň möwjeýän günlerinde duşenbe güni Eýranyň täze dini lideri Mojtaba Hamenei goldaw berýändiklerini mälim etdi.
Russiýanyň Prezidenti Wladimir Putin Hameneiniň Eýranyň dini lideri hökmünde bellenmegini gutlaýan telegramma ugratdy we Moskwanyň Tährana goldaw berýändigini aýan etdi.
Kreml tarapyndan berlen beýannamada “Eýranyň ýaragly hüjümlere sezewar bolýan günlerinde bu ýokary wezipedäki işleriňiz şübhesiz uly gahrymanlyk talap eder. Men siziň kakaňyzyň işlerini uly buýsanç bilen dowam etdirjekdigiňize we agyr synagdan geçýän eýranyň halkyny birleşdirjekdigiňize ynanýaryn” diýildi.
Wladimir Putin Hameneiniň mehrum lider kakasy Ali Hameneiniň ýoluny dowam etdirjekdigine uly ynam bildirdi.
Kreml tarapyndan berlen beýannamada, “Öz adymdan Tährana uly goldaw berýändigimizi we eýranly dostlarymyz bilen hyzmatdaşlyk etmäge dowam etjekdigimi nygtamak isleýärin. Russiýa geçmişde Eýran Yslam Respublikasynyň ynamdar hyzmatdaşy boldy we şeýle bolmaga dowam eder”diýildi.
Hytaý söweşe garşy
Hytaý duşenbe güni Eýranyň täze dini lideriniň bellenmegini kabul etdi. Resmi Pekin Eýranyň 56 ýaşyndaky täze dini lideriniň haýsydyr bir görnüşde nyşana alynmagyna hem garşy çykdy.
Daşary işler ministrliginiň metbugat sekretary Žiakun, Hytaýyň daşary ýurtlylaryň Eýranyň içerki işlerine goşulmagyna garşydygyny belledi.
Hytaý, Eýranyň özygtyýarlygyna sarpa goýulmagy, çaknyşyklaryň gyssagly bes edilmegi we gepleşikleriň geçirilmegi üçin çagyryş etdi.
ABŞ bilen Ysraýylyň Eýrana guraýan bilelikdäki hüjümleri
Eýranda 56 ýaşyndaky din adamy Mojtaba Hamenei ýurduň üçinji ýokary lideri boldy.
Hamenei ýurduň iň ýokary syýasy ýolbaşçylaryny saýlamak jogapkärçiligi bolan 88 agzaly Hünärmenler Mejlisi tarapyndan saýlandy.
Eýranyň Prezidenti Mesud Pezeşkiýan karary dartgynly döwürde milli jebisligi güýçlendirjek başlangyç hökmünde häsiýetlendirdi.
Mojtaba 37 ýyl Eýrany dolandyran kakasy Ali Hameneiniň 28-nji fewralda guralan howa hüjüminde ýogalmagy sebäpli täze dini lider hökmünde bellendi.
ABŞ bilen Ysraýylyň Eýrana guraýan bilelikdäki hüjüminde Ali Hameneiň Tährandaky kabulhanasy nyşana alnypdy we Eýranyň 86 ýaşynda dini lideri aradan çykdy.
Şol günden bäri sebitde güýçli çaknyşyklar bolýar.
Ysraýyl bilen ABŞ-nyň bilelikdäki hüjümleri asuda ilat we çagalar bilen birlikde 1250 eýranlynyň ýogalmagyna sebäp boldy.
Eýran hem Ysraýyla we ABŞ-nyň Aýlag ýurtlaryndaky harby bazarlaryna raketa we dron hüjümlerini guramak bilen garşylyk görkezýär.
