Türkiyäniň Daşary işler ministriniň orunbasary Berris Ekinji penşenbe güni beren beýanatynda, Türkiyäniň Gara deňizdäki erkin ykdysady zolagynda Russiýa bilen arabaglanyşykly gämilere guralan birnäçe hüjüme alada bildirmek üçin Ukrainanyň ilçisini we Russiýanyň ilçisiniň wagtlaýyn ygtyýarly wekilini Daşary işler ministrligine çagyrdy.

Berris Ekinji parlamentiň daşary işler komitetinde eden çykyşynda: "Soňky hepdelerde Russiýa-Ukraina urşunyň örän çynlakaý güýçlenendigini, özara hüjümleriň bolandygyny gördük. Soňky gezek bolsa, Gara deňziň aýratyn ykdysady zolagymyzda anyk hüjümler boldy" diýip, aýtdy.

Berris Ekinji: “Düýn we şu gün biz Russiýanyň ilçisiniň wagtlaýyn ygtyýarly wekilini we Ukrainanyň ilçisini çagyryp, olara aladalarymyzy ýetirdik” diýdi.

Russiýanyň "Midwolga 2" gämisi 2-nji dekabrda Türkiyäniň kenaryndan 80 deňiz mili uzaklykda dron tarapyndan hüjüme sezewar boldy we oňa ýeňil görnüşde zeper ýetdi.

Mundan ozal bolsa, 28-nji noýabrda, Kairos we Wirat tankerlerine Türkiyäniň kenaryndan 28 we 38 deňiz mili uzaklykda hüjüm guralypdy we şol hüjümler ýangyna sebäp bolupdy we tankere zyýan ýetiripdi.

Prezident Rejep Taýýip Erdogan 1-nji dekabrda şeýle hüjümleriň alada döredýän eskalasiýa alamatydygyny we ony düşündirip bolmajakdygyny aýtdy.