Erdogan Eýrana guralýan bikanun hüjümler sebäpli sebite uly howpuň abanýandygyny aýtdy

Prezident R. T. Erdogan Eýrana garşy guralýan bikanun hüjümler sebäpli sebite uly howpuň abanýandygyny aýtdy.

Anna güni Antalýa Diplomatiýa forumynyň çäginde Pakistanyň Premýer-ministri Şabhaz Şerif we Kataryň Emiri Şyh Temim bin Hamed Al Sani bilen duşuşan Erdogan, Türkiýäniň ylalaşygyň dowam etdirilmegi we yzygiderli parahatçylygyň ýola goýulmagy üçin tagalla etmäge dowam etjekdigini aýtdy.

Üç lider sebitde yzygiderli parahatçylygyň ýola goýulmagy üçin edilýän tagallalar hakynda pikir alyşdy.

Ylalaşyk tagallalary

Prezident Erdogan bilen Pakistanyň Premýer-ministri Şahbaz Şerif duşuşykda özara gatnaşyklar bilen birlikde Eýrana guralýan hüjümleriň bes edilmegi üçin edilýän tagallalar hakynda pikir alyşdy.

Erdogan Türkiýäniň energetika, söwda we goranyş senagatynyň başda durmagynda Pakistan bilen edýän hyzmatdaşlygyny pugtalandyrmak bilen dowam etdirjekdiklerini aýtdy.

Ylalaşygyň gazanylmagynda uly rol oýnan Pakistan hakynda öwgüli sözler aýdan Erdogan, ylalaşygyň yzygiderli parahatçylyk şertnamasyna öwrülmegi üçin tagalla etjekdiklerini nygtady.

Gaza ylalaşygynyň dowam etdirilmelidigini nygtan Erdogan, iki döwletli çözgüde goldaw berilmelidigini ýatlatdy.

Siriýanyň lideri bilen duşuşyk geçirildi

Prezident R. T. Erdogan forumyň çäginde şeýle hem Siriýanyň Prezidenti Ahmed as Şaraa bilen duşuşdy.

Duşuşykda sebitde başdan geçirlen soňky wakalar ara alnyp maslahatlaşyldy.

Prezident Erdogan, Damaskyň ýurduň jebisligi, bitewiligi we gaýtadan dikeldilmegi üçin uly işleri amala aşyrýandygyna ünsi çekdi.

Prezident R. T. Erdogan bu etapda Siriýa goldaw bermäge dowam etjekdiklerini ýatlatdy.

Duşuşyga Daşary işler ministri Hakan Fidan we Milli howpsuzlyk gullugynyň başlygy Ibrahim Kalyn bilen birlikde beýleki ýolbaşçylar gatnaşdy.