Ysraýylyň iki ýyldan bäri Gaza guraýan hüjümleri sebäpli sebit harabalyga öwrüldi. Halk açlyga garşy göreşýär. Ysraýyl söweş habarlaryny halka ýetirýän žurnalistleri nyşana almaga dowam edýär.
Ysraýylyň 2023-nji ýylyň oktýabr aýynda Gaza hüjüm etmegi bilen başlan etap 2025-nji ýylda BMG tarapyndan resmi taýdan genosid hökmünde ykrar edildi.
Hüjümler sebäpli esasy bölegi zenanlardan we çagalardan ybarat 67 müňden gowrak palestinli ýogaldy. 170 müň adam ýaralandy. Tutuş ilat açlyk sebäpli öýüni terk edýär.
Ysraýyl Gazany gabaw astyna almak bilen bilkastlaýyn ýagdaýda halky açlyga sezewar edýär.
“Genosid ýaragy hökmünde açlyk”
Ysraýylyň bilkastlaýyn ýagdaýda Gaza azyk, suw we ýangyç kömeginiň berilmegini bökdemegi, 21-nji asyryň iň uly gumanitar krizislerinden biriniň başdan geçirilmegine sebäp boldy.
BMG awgust aýynyň ahyrynda Gazanyň käbir etrapçalarynda gytlyk yglan etdi. Ynsanperwer kömek guramalary birnäçe aýdan bäri gytlyk meselesinde duýduryş berýär.
Merkezi Ženewada ýerleşýän Euro-Med adam hukuklary guramasynyň başlygy Ramy Abduýa görä, Ysraýylyň gabawy “azygy we suwu söweş ýaragy we genosid ulagy hökmünde ulanmak syýasaty” manysyny aňladýar.
Abdu “Gazadaky gytlyk, tebigy apatlar ýada ykdysady çökgünlik sebäpli emele gelmedi” diýdi.
Ysraýyl 2006-njy ýyldan bäri Gazanyň serhetlerine gözegçilik edýär we ozalky gabawlarda palestinlileriň gündelik kaloriýalaryny hasaplapdy.
2023-nji ýylyň 9-njy oktýabrynda doly gabawyň yglan edilendigi sebäpli azyk, agyz suwy, ýangyç we elektrik togy kesildi.
Kärhanalar ýapyldy, ekin meýdanlary bombalandy we açlyk ýarag hökmünde ulanylmaga başlandy.
Üstümizdäki ýylyň başynda açlyk çalt depginde ýaýbaňlanmaga başlady. Açlyk çagalara, göwreli zenanlara we ýaşulylara uly zeper ýetirdi.
Ynsanperwer kömek kerwenleriniň sebite girmegine rugsat berilmedi.
Ysraýylyň 2025-nji ýylda guran Gaza ynsanperwer kömek gaznasynyň öňünde azyk kömegini almaga garaşýan asuda ilat bombalandy.
BMG azyk kömegini almaga garaşýan 1760 palestinliniň öldürlendigini mälim etdi.
Gytlyk yglan edildi, jogapkärlerinden hasap soralmady
BMG-nyň Azyk howpsuzlygy gullugy 2025-nji ýylyň 22-nji awgustynda Gazada “gytlyk” yglan etdi.
Gazadaky Palestiniň Saglygy goraýyş ministrligi açlyk sebäpli azyndan 460 adamyň ýogalandygyny mälim etdi. Açlyk sebäpli ýogalanlaryň 150-i çaga. Gaza şäherindäki her 5 çagadan biri ýeterlik iýmitlenmeýär.
Emma halkara jemgyýetçiligi Ysraýylyň tutumyna ýeterlik garşylyk görkezip bilmeýär.
Abdu “Dünýä ýurtlary ABŞ-nyň we Ýewropanyň berýän goldawy sebäpli BMG-nyň kararlaryna äsgermezçilik edýän Ysraýyla degişli gaýtawuly görkezip bilmedi” diýdi.
Žurnalistler üçin iň pajygaly söweş
Ysraýylyň Gaza guraýan hüjümlerinde palestinli žurnalistler nyşana alynýar.
TRT Worldiň žurnalisti Ýahýa Barzag 2025-nji ýylyň 30-njy sentýabrynda Deýr Al Balaha guralan howa hüjüminde öldürildi.
2023-nji ýyldan soň sosial mediada Ysraýylyň hüjümleri sebäpli emele gelen harabalyklara, ýogalan adamlaryň jesetlerine giňişleýin ýer berildi.
Uruşdan öň çaga suratçysy hökmünde tanalýan Barzag söweşde öldürlen azyndan 250 žurnalistden biri boldy.
