Ukrainanyň Prezidenti Zelenskiýiň orunbasary Andiý Ýermak penşenbe güni Ze Atlantige beren beýannamsynda, Ukrainanyň Prezidenti Wolodimir Zelenskiýiň parahatçylygyň ýola goýulmagy üçin Russiýa ýer bermegi asla kabul etmejekdigini aýtdy.
Ýermak beýannamasynda “Zelenskiýiň liderligi döwründe hiç kim biziň ýer bermegimize garaşmasyn. Ol ýerleri asla bermeris”diýdi.
Ýermak, Ukrainanyň rus güýçleri tarapyndan ele geçirlen topraklaryndan asla ýüz öwürmejekdiklerine ünsi çekdi.
Ýermagyň, Russiýanyň Prezidenti Wladimir Putiniň, Ukrain güýçleri Russiýanyň öz territoriýasy hökmünde yglan eden sebitlerinden çekilen halatynda Moskwanyň hüjümlerini bes etjekdigi, şeýle bolman halatynda rus güýçleriniň şol ýerleri zor bilen ele geçirjekdigi hakyndaky duýduryşyndan soň beren beýannamasy ünsleri özüne çekdi.
Russiýanyň Prezidenti Putin Gyrgyzystana guran saparynyň çäginde beren beýannamasynda “Ukrain güýçleri rus sebitlerini terk eden halatynda çaknyşyklary bes ederis, şeýle bolman halatynda harby hüjümler arkaly şol ýerleri alarys” diýipdi.
Russiýa häzirki wagtda Ukrainanyň territoriýasynyň 1/5 bölegine gözegçilik edýär we basyp alyşlyk astyndaky ýerleriň statusy parahatçylyk etabynyň öňündäki esasy bökdençliklerden biri bolmaga dowam edýär.
ABŞ-nyň parahatçylyk meýilnamasy
Resmi Waşington 4 ýyla golaý wagt bäri dowam edýän söweşiň bes edilmegi üçin tagalla edýär.
ABŞ-nyň resmileri garaşylmadyk ýagdaýda çaknyşýan taraplara täze parahatçylyk meýilnamasyny hödürledi.
ABŞ-nyň Ýewropaly ýaranlarynyň garaýşy alynmazdan taýarlan meýilnamasy Ukrainanyň gündogar Donesk sebitinden çekilmegini we ABŞ-nyň Donesk, Krym we Lugansk sebitlerini rus topragy hökmünde ykrar etmegini göz öňünde tutýar.
Ukraina Russiýanyň basyp alyşlygyny legallaşdyrjak haýsydyr bir teklibi kabul etmejekdigini mälim etdi.
