Türkiyäniň Daşary işler ministrligi Demirgazyk Kipr Türk Respublikasynyň (DKTR) Kiriniýa portundan çykyp, Mersiniň Taşuju portuna barýan ýolagçy gämisiniň batmagy netijesinde bolan adam pidalaryna çuňňur gynanç bildirdi.
Daşary işler ministrligi DKTR-nyň suw giňişliginde ýolagçy gämisiniň batmagy bilen baglanyşykly ýazmaça beýanat berdi.
Beýanatda: "Şu gün Demirgazyk Kipr Türk Respublikasynda (DKTR) Kiriniýa portundan Mersiniň Taşuju prtuna barýarka ýolagçy gämisiniň batmagy netijesinde başdan geçirlen heläkçilikde bolan adam pidalaryna çuňňur gynanç bildirýäris. Heläkçilikde ýogalan adamlara Alladan rehim we olaryň maşgala agzalaryna, milletimize we DKTR-nyň halkyna gynanç bildirýäris" diýildi.
Beýanatda Demirgazyk Kipr Türk Respublikasynyň resmileri tarapyndan geçirilýän işjeň gözleg we halas ediş işleriniň Türkiýäniň doly goldawyna eýe bolandygy we gözleg we halas ediş işlerine Türkiýeden iki dikuçaryň, iki gaýygyň we suwbaz toparyň, şeýle hem Harby-deňiz güýçleriniň serkerdeliginiň iki gämisiniň gatnaşýandygy bellenildi.
Beýanatda, mundan beýläk-de adam ýitgileriniň öňüni almak we ýiten adamlary tapmak üçin edilýän tagallalaryň Demirgazyk Kipr Türk Respublikasynyň resmileri bilen ýakyn utgaşyklylykda we hyzmatdaşlykda dowam edýändigi bellenildi.
DKTR-nyň suw giňişliginde batan gämi
Demirgazyk Kipr Türk Respublikasynyň Kiriniýa porty bilen Mersiniň Taşuju portunyň arasynda gatnaýan ýokary tizlikli ýolagçy gämisi "Filo Jet" günortan Kiriniýadan ugrandan gysga wagt soň batdy.
Gämi Kiriniýa portuna gaýdyp barmaga synanyşanda dolulygyna batdy. Gämidäki 267 adamyň, şol sanda 259 ýolagçynyň we 8 ekipaž agzasynyň 241-si halas edildi, 8-si bolsa ýogaldy.
Dereksiz ýiten 18 adamy tapmak üçin gözleg we halas ediş işleri dowam edýär.
