Beýik Britaniýanyň premýer-ministri Keir Starmer Eýranyň Pars aýlagy sebitinde raketa hüjümleriniň köpelmeginden soň, öz ýurdunyň ABŞ-nyň öz bazalaryny "belli we çäkli goranyş maksatlary" üçin ulanmaga rugsat berjekdigini aýtdy.
Starmer ýekşenbe güni beren beýanatynda: "ABŞ bu anyk we çäkli goranyş maksady üçin Beýik Britaniýanyň bazalaryny ulanmaga rugsat sorady. Biz Eýranyň sebite raketa atmagynyň, bigünä raýatlary öldürmeginiň, Britaniýanyň raýatlarynyň janyny howp astyna salmagynyň we bu prosese gatnaşmaýan ýurtlara hüjüm etmeginiň öňüni almak üçin bu haýyşy kanagatlandyrmak kararyna geldik" diýdi.
Starmer Beýik Britaniýanyň kararynyň esasynyň uzak wagtlap dowam edýän dostlarynyň we ýaranlarynyň bilelikdäki öz-özüni goramagy we Britaniýanyň raýatlaryny goramakdygyny belläp: "Beýik Britaniýanyň Eýrana garşy hüjümlere gatnaşmazlygy baradaky kararymyz bilkastlaýyn boldy. Esasanam, sebit we dünýä üçin iň gowy ýoluň gepleşikler arkaly çözgüt tapmakdygyna ynanýandygymyz üçin" diýdi.
"Öz-özüňi goramak çäreleri"
Beýik Britaniýanyň hökümetiniň web sahypasynda çap edilen aýratyn beýanatda ýurduň hukuk pozisiýasy beýan edildi.
Starmer Eýran howpuny bes etmegiň ýeke-täk ýolunyň raketalary olaryň gözbaşynda, ammarlarynda ýa-da olary atmak üçin ulanylýan atyjylarda ýok etmekdigini aýtdy.
Ýekşenbe güni irden Fransiýa, Germaniýa we Beýik Britaniýa bilelikdäki beýanat berip, zerur bolan halatynda öz bähbitlerini we Pars aýlagyndaky ýaranlarynyň bähbitlerini goramaga taýýardyklaryny we Eýrana garşy "goranyş çärelerini" görüp biljekdiklerini yglan etdiler.
Starmer Eýran howpunyň Britaniýanyň Ýaragly güýçlerine hem howp astyna salýandygyny aýtdy.
