Papa Leo XIV ilkinji daşary ýurt sapary bilen Türkiýä geldi

Papa Leo XIV Prezident R. T. Erdoganyň myhmany hökmünde penşenbe güni ilkinji daşary ýurt sapary bilen Türkiýä geldi.

Papa Türkiýede halkara parahatçylyga ünsi çekdi we saparynyň dünýä ýurtlaryna parahatçylyk getirmegini umyd edýändigini aýtdy.

Papa howa menzilinde Türkiýäniň Medeniýet we syýahatçylyk ministri Mehmet Nuri Ersoý bilen birlikde beýleki ýolbaşçylar tarapyndan garşylandy.

Papa Türkiýä guraýan saparynda kardinal Pietro Parolin we arkepiskop Pol Riçard Gallagher ýoldaşlyk edýär.

Papa Leo XIV ITA Airwaýsa degişli ýörite uçary bilen Türkiýä geldi.

Papa Türkiýede saparda bolmakdan hoşaldygyny we bu saparyň ähli hristianlar we dünýä üçin diýseň möhümdigini nygtady

Papa Leo XIV Türkiýä sapar guramak üçin sabyrsyzlanandygyny belledi.

Türkiýede we Liwanda geçirjek duşuşyklary hakynda durup geçen Papa, saparynyň dünýäde parahatçylygyň ýola goýulmagyny maksat edinýändigini nygtady.

Papa din we ynanç tapawutlulygyna garamazdan adamzadyň biri-birine baglydygyny nygtady we dünýä ýurtlaryna parahatçylyk üçin bitewilik çagyryşyny berdi.

Watikanyň lideri parahatçylygy we halkara jebisligi ileri tutýan tagallalara goşant goşmak isleýändigini aýtdy.

Papanyň sapary Türkiýe Respublikasyny esaslandyryjy Mustafa Kemal Atatürkiň aramgähinde geçirlen resmi dabara bilen başlady.

Prezidentiň Kompleksinde Papa üçin resmi garşylama dabarasy geçirildi.

Papa Leo XIV Türkiýe Respublikasynyň Prezident Erdogan bilen Türkiýe bilen Watikanyň arasyndaky gatnaşyklar, Palestinde başdan geçirilýän soňky wakalar bilen birlikde sebitara we halkara meseleler hakynda pikir alyşar.

Erdogan bilen Papanyň Ankarada Prezidentiň Komplesinde ýerleşýän Millet kitaphanasynda metbugata beýannama bermegine garaşylýar.

Kitaphana dünýäniň iň uly üçünji kitaphanasy hökmünde bilinýär.

Papa anna güni Stambulda Sain Esprit katedralynda hristian din adamlary bilen duşuşar we Iznik şäherinde geçiriljek dini dabara gatnaşar.

Papanyň şenbe güni Soltanahmet metjisinde we Mor Efrem sürýany buthanasyna baryp görmegine we Fener frek patriarhy Bartolomeos bilen duşuşmagyna garaşylýar. Papa Wolkswagen Arenada geçiriljek dini dabara gatnaşar.

Papanyň Türkiýä guraýan saparynyň çäginde Ermeni Apostolik katedralynda geçiriljek dini dabara hem gatnaşmagyna garaşylýar.