Türk resmileri Türkiyäniň prezidenti Rejep Taýýip Erdogan bilen ABŞ-nyň prezidenti Donald Trampyň iki taraplaýyn gatnaşyklary, sebitleýin we global meseleleri ara alyp maslahatlaşmak üçin telefon arkaly söhbetdeşlik geçirendigini habar berdiler.

Kommunikasiýalar edarasyndan berlen beýanata görä, iki lider Türkiye bilen ABŞ-nyň arasyndaky ikitaraplaýyn syýasy gatnaşyklar, goranmak senagatyndaky hyzmatdaşlyk, iki ýurduň arasyndaky söwda möçberi maksadyna ýetmek üçin edilmeli ädimler, şeýle hem Gaza we Wenesuela ýaly sebitleýin we global meseleler barada pikir alyşdylar.

Erdogan ozal beren beýanatynda telefon söhbetdeşliginde Ankaranyň Wenesuela bilen bagly aladalaryny ýetirendigini habar beripdi.

Prezident Erdogan Ministrler Kabinetiniň mejlisinden soň eden çykyşynda: “ABŞ-nyň prezidenti Tramp bilen geçiren telefon arkaly söhbetdeşligimizde Türkiyäniň aladalaryny oňa ýetirdik. Wenesuelanyň durnuksyzlyga sezewar edilmeli däldigini nygtadyk” diýdi.

Prezident Erdogan Türkiyäniň Wenesuela halkyna goldaw bermäge dowam etjekdigini beýan etdi.

Erdogan: “Türkiye we türk halky dostlukly Wenesuelanyň halkynyň abadançylygy, parahatçylygy we ösüşi gazanmak ugrundaky tagallalarynda olary goldamaga dowam eder” diýdi.

Ak Tam telefon söhbetdeşligi barada entek beýanat bermedi.