Prezident Rejep Taýýip Erdogan: “15-nji iýul diňe bir hyýanatçylykly agdarylyşyk synanyşygynyň öňüniň alnan gije däl, eýsem taryha altyn harplar bilen ýazylan demokratiýanyň uly ýeňşi boldy, milletimiz öz erkini, demokratiýasyny we garaşsyzlygyny janyny gaýgyrman gorady” diýdi.

Prezident Erdogan 15-nji iýul Demokratiýa we Milli Jebislik güni mynasybetli “15-nji iýul: Türkiye asyrynyň Garaşsyzlyk Jarnamasy” atly makala ýazdy.

Prezident Erdogan gazetlerde çap edilen makalasyny “Taryhyň ugruny üýtgeden beýik milletiň garaşsyzlygy we geljegi üçin janyny gurban edip göreş alyp baran şol aýylganç gijä on ýyl geçdi” diýen setirler bilen başlap:

"15-nji iýul diňe bir hyýanatçylykly döwlet agdarylyşygy synanyşygynyň öňüniň alnan gije däldi; bu taryha altyn harplar bilen ýazylan demokratiýanyň uly ýeňşi boldy, milletimiz öz erkini, demokratiýasyny we garaşsyzlygyny janyny gaýgyrman gorady. Şol gije asylly milletimiz watanymyzy basyp almaga synanyşan imperialistlere we olaryň hyzmatdaşlaryna edil Milli Azat edijilik urşunda bolşy ýaly taryhdaky iň uly sapaklaryň birini berdi.

15-nji iýul, şahyryň: "Ata-babalarymyzyň beýikligi bütin dünýäde belli / Tebigat üýtgeýär pikir etme, bu gan henizem şol gan!" setirlerinde belläp geçişi ýaly, müň ýyl mundan ozal Malazgirtde gahrymanlarça söweşenleriň, 500 ýyl mundan ozal Stambulyň diwarlarynda Soltan Fatihiň arzuwyny amala aşyrmak we Pygamberimiziň hoş habaryna ýetmek üçin ruhlaryny we bedenlerini howp astyna salanlaryň we ýüz ýyl mundan ozal şahyryň öz setirlerinde beýan edişi ýaly, watany goramak üçin janlaryny gurban edenleriň ynamy we tutanýerliligi bilen köçelere we meýdançalara çykan beýik milletimiziň taryha altyn harplar bilen ýazylan beýik dessanydyr” diýip nygtady.