Günorta Koreýanyň we ABŞ-nyň harby güýçleri bilelikdäki mina söweş mümkinçiliklerini ýokarlandyrmagy maksady bilen, ýurduň günorta-gündogar kenaryndaky Pohang şäheriniň golaýyndaky suw giňişliginde bilelikdäki deňiz türgenleşigini geçirdiler.
Ýonhap habarlar agentliginiň çarşenbe güni Günorta Koreýanyň harby-deňiz güýçleri tarapyndan berilen maglumata esaslanyp beren habaryna görä, sişenbe güni tamamlanan 9 günlik türgenleşikde Günorta Koreýanyň Nampo MLS-II mina gämisi we ABŞ-nyň USS Warrior (MCM-10) mina gämisi bilen birlikde taraplaryň ikisinden jemi 10 harby gämi we 3 dikuçar gatnaşdy.
Günorta Koreýanyň harby-deňiz güýçleriniň 52-nji Mina flotunyň serkerdesi kapitan Lee Taeg-Seon: “Mina söweşleri boýunça amaly okuwlary dowam etdirmek bilen, mümkin bolan ýagdaýynda esasy portlarymyzy we deňiz transport ýollarymyzy goramak ukybymyzy güýçlendireris” diýip belledi.
Bu türgenleşik, 2014-nji ýylda ilkinjisi başladylanyndan bäri iki ýurt tarapyndan geçirilen 10-njy deňiz mina söweş türgenleşigi boldy.
Günorta Koreýa we ABŞ güýçleri sişenbe güni Koreýa ýarym adasynda azyndan bir B-1B bombalaýjy harby uçarynyň gatnaşmagynda bilelikde howa türgenleşikleri geçirip bu fewral aýyndan bäri geçirlen 2-nji harby türgenleşik boldy.
Geçen hepde ABŞ we Günorta Koreýa hem uruş döwründe we parahatçylyk döwründe deňizde bilelikde gözleg we halas ediş mümkinçiliklerini gowulandyrmak üçin Çangwonyň suw giňişliginde deňiz türgenleşigini geçirdiler.
