Kremliň metbugat wekili Dmitriý Peskow Russiýanyň ABŞ-nyň araçylygynda Ukrainadaky urşy bes etmäge gönükdirilen parahatçylyk gepleşikleriniň tiz wagtda täzeden başlanmagyny umyt edýändigini aýtdy.
Bu mesele boýunça fewral aýyndan bäri Russiýa bilen Ukrainanyň arasynda hiç hili gepleşik geçirilmedi, ýöne ABŞ-nyň prezidenti Donald Tramp togtadylan prosesi täzeden başlatmak üçin hepdäniň ahyrynda wekiliýeti Moskwa, soňra bolsa Kiýewe iberipdi.
Çarşenbe güni Peskow ABŞ-nyň Döwlet sekretary Marko Rubionyň gepleşikleri täzeden başlatmak we özara kabul ederlikli netijä ýetmek üçin ýol kartasyny döretmegiň mümkindigi baradaky sözlerine jogap berdi.
Kiýew Moskwanyň has köp territoriýa talaplaryny ret edýändigi sebäpli, Russiýa bilen Ukrainanyň arasyndaky 4,5 ýyllap dowam eden urşuň nädip gutarmalydygy barada uly boşluk galýar.
Peskow Moskwanyň mümkin bolan ylalaşygyň jikme-jikliklerini açyk ara alyp maslahatlaşmajakdygyny, ýöne gepleşikleriň täzeden başlamagy üçin "tassyklanan syýasy islegiň" bardygyny aýtdy.
ABŞ-nyň Prezidenti Donald Tramp bilen Russiýanyň prezidenti Wladimir Putin telefon arkaly söhbetdeş bolanlaryndan bir gün soň beýanat beren Peskow: "Biz bu gepleşikleriň ýakyn geljekde täzeden başlanmagyna umyt edýäris we amerikaly kärdeşlerimiz bilen aragatnaşyk saklaýarys" diýdi.
Peskow şeýle hem Russiýa bilen ABŞ-nyň arasyndaky tussag alyş-çalyş meselesiniň "yzygiderli ara alnyp maslahatlaşylýan temadygyny” aýtdy we Russiýanyň geçen aý Trampyň haýyşy boýunça amerikan tussagly Robert Gilmany boşadandygyny ýatlatdy.
Iki ýurt soňky birnäçe ýylyň dowamynda dürli wagtlarda tussag alyş-çalşygyny amala aşyrdylar.
