Türkiye Respublikasynyň Prezidentliginiň ýanyndaky Kommunikasiýalar edarasy Prezident Rejep Taýýip Erdoganyň Sudanyň Premýer-ministri Kamil Idrisini Ankara guran iş saparynyň çäginde Prezident köşgünde kabul edendigini aýan etdi.

Kommunikasiýalar edarasy Türkiyäniň sosial media platformasy NSosyal arkaly beren beýanatynda çarşenbe güni geçirilen duşuşykda Türkiye bilen Sudanyň arasyndaky gatnaşyklara, şeýle hem sebitleýin we global meselelere garalandygyny habar berdi.

Prezident Erdogan maksadyň ädilen we ädiljek ädimler arkaly Türkiye bilen Sudanyň arasyndaky gatnaşyklary has-da ösdürmekdigini we Türkiyäniň Sudanyň özygtyýarlylygyna we territorial bitewiligine berk goldawyny dowam etdirýändigini aýtdy.

Prezident Erdogan şeýle hem Ankaranyň Sudandaky çaknyşygy bes etmäge we gatnaşyklary kadalaşdyrmaga kömek etmek üçin tagalla edýändigini we Türkiyäniň ot açmagy bes etmek we giňişleýin syýasy tapgyry başlatmak üçin diplomatik tagallalary goldaýandygyny aýtdy.

Erdogan Sudanyň halkynyň ýagdaýyny kadalaşdyrmak maksady bilen berilýän ynsanperwer kömegiň şu döwürde hem artjakdygyny aýtdy.

Kabul edişlikde wise-prezident Jewdet Ýylmaz, daşary işler ministri Hakan Fidan, Energetika we tebigy serişdeler ministri Alparslan Baýraktar, Oba hojalyk we tokaý hojalygy ministri Ibrahim Ýumakly we Prezidentiň Kommunikasiýalar edarasynyň başlygy Burhanettin Duran hem bardy.