ABŞ-nyň prezidenti Donald Tramp Eýran bilen urşuň bes edilmegi baradaky ylalaşyga ýekşenbe güni gol çekiljekdigini aýan etdi. Emma, Eýran Trampyň beýanatyna garşy çykyp, şol gün hiç hili ylalaşyga gol çekilmegine garaşylmaýandygyny aýtdy.
Tramp şeýle hem ABŞ-nyň sebitde ýagdaý asudalaşandan soň Eýranyň baýlaşdyrylan uranyny tapyp ýok etjekdigini aýtdy.
Tramp şenbe güni “Truth Social” platformasyndan beren beýanatynda: “Wagty gelende, ähli zat asudalaşanda, owadan B-2 bombardir uçarlarymyzyň we olaryň ussat uçarmanlarynyň kömegi bilen, biz beýik granit daglarynyň çuňlugynda gömülen ýadro materialyny almaga gideris. Eýranda ýa-da ABŞ-da bolsun, biz ony pes derejä çenli baýlaşdyryp, ýok ederis” diýip belledi.
Tramp Eýran bilen ylalaşyga gol çekmegiň meýilleşdirilýändigini we ylalaşyga gol çekilenden soň Ormuz bogazynyň "hemmeler üçin açyljakdygyny" aýtdy.
Tramp: "Ylalaşyga ertir gol çekilmegi meýilleşdirilýär. Gol çekilenden soň dessine Ormuz bogazy hemmeler üçin açylar " diýdi.
Emma Eýran ABŞ bilen özara düşünişmek baradaky memoranduma ýekşenbe güni gol çekilmejekdigini, ýöne gol çekişligiň ýakyn günlerde amala aşyrylyp bilinjekdigini mälim etdi.
Eýranyň Daşary işler ministrliginiň metbugat wekili Ismail Bekaýi Yslamabadyň özara düşünişmek baradaky memorandumynyň Liwanda hem şol sanda ähli ugurlarda urşuň bes edilmegine gönükdirilendigini we ýadro meselesiniň häzirki tapgyrda çözülmejekdigini aýtdy.
Tramp bolsa Tähranyň indi ýadro ýaragyny islemeýändigini öňe sürdi.
“Tasnim” habar agentliginiň habaryna görä, Bekaýi: “Biz garaşyp, özara düşünişmek baradaky memoranduma haçan gol çekiljekdigini anyk görmeli. Oňa ertir gol çekilmez, ýöne onuň ýakyn günlerde bolmagynyň mümkinçiligini hem aradan aýryp bolmaz” diýdi.
