Eýranyň Daşary işler ministri Abbas Arakçi, anna güni beren beýannamasynda, ABŞ-nyň Prezidenti Donald Trampyň Eýrany ylalaşyga mejbur etmek üçin çäkli harby hüjümiň guralmagy meselesini seljerýändigi hakyndaky sözlerine garamazdan, Tähranyň dowam edýän gepleşiklerde ne ýadro meýilnamasyny togtatmagy teklip edendigini,  nede ABŞ-nyň urany kämilleşdiriş işlerini bes etmegini talap edendigini aýtdy.

Merkezi ABŞ-da ýerleşýän MS Now teleýaýlymyna beýannama beren Arakçi, Tähran bilen Waşingtonyň urany kämilleşdiriş işleri bilen birlikde Eýranyň ýadro maksatnamasyny ara alyp maslahatlaşýandygyny aýtdy.

Arakçi “Eger kimdir biri Eýranyň ýadro meselesini çözmek we parahatçylykly maksatly galmagyny isleýän bolsa, ýeke-täk ýol bar, ol hem meseläniň gepleşik we diplomatiýa arkaly çözülmegidir” diýdi.

Beýleki tarapdan Tramp, Eýrana garşy çäkli hüjümiň guralyp biljekdigini aýtdy.

Ak Tamda metbugata beýannama beren Tramp, Eýrany ylalaşyga mejbur etmek üçin çäkli hüjümiň guralyp biljekdigini belledi.

ABŞ-nyň Prezidenti Tramp mesele hakynda giňişleýin maglumat bermekden gaça durdy.

Eýran bilen ABŞ-nyň arasyndaky ýadro gepleşikleri üstümizdäki aýyň başynda Maskatda gaýtadan başlapdy.

Sişenbe güni Omnanyň töwellaçylyk etmeginde Ženewada gepleşikleriň ikinji tapgyry geçirildi.

ABŞ-nyň Prezidenti Tramp, penşenbe güni Waşingtonda geçirlen Parahatçylyk geňeşiniň açylyş dabarasynda eden çykyşynda, gepleşikler netijesiz bolan halatynda ABŞ-nyň 10-15 günüň dowamynda Eýrana garşy harby hüjüm gurap biljekdigini duýdurdy.