Milli Howpsuzlyk Geňeşi Prezident Erdoganyň ýolbaşçylygynda Beştepede jemlener. Gün tertibiniň esasy meseleleri ABŞ bilen Eýranyň arasyndaky ylalaşyk, Gündogar Ortaýer deňzindäki wakalar we "Terrorsyz Türkiýy" tapgyry bolar. Milli Howpsuzlyk Geňeşiniň maslahatynda beýleki sebitleýin we halkara howpsuzlyk meseleleri hem ara alnyp maslahatlaşylar.
Milli Howpsuzlyk Geňeşi şu ýyl Prezident Erdoganyň ýolbaşçylygynda üçünji gezek geçirler we onuň gün tertibi örän möhüm bolar. Beştepede geçiriljek maslahatyň iň möhüm temasy ABŞ-Eýran parahatçylyk tapgyry bolar.
28-nji fewralda başlanan urşuň başyndan bäri hemişelik parahatçylygyň ýola goýulmagy üçin ýadawsyz tagalla edýän Ankara Ýakyn Gündogardaky wakalara ýakyndan gözegçilik edýär.
Milli Howpsuzlyk Geňeşiniň maslahatynda Waşington-Tähran ylalaşygynyň ýerinde doly ýerine ýetirilmegini we gepleşik tapgyrynyň üstünlikli tamamlanmagyny üpjün etmek üçin edilmeli tagallalar ara alnyp maslahatlaşylar.
Gündogar Ortaýer deňzinde edilmeli ädimler seljeriler
Gündogar Ortaýer deňzinde, esasanam Kiprde bolan prowokasiýalar hem ara alnyp maslahatlaşylar.
Genosid jenaýatçysy Ysraýyl bilen ýakynlaşan Kipriň Grek böleginiň we Fransiýa bilen harby ylalaşyga gol çekmegini "Adada gapma-garşylyk oduny ýakmak synanyşygy" hökmünde görýän Türkiye sebitdäki ýagdaýy ýakyndan gözegçilikde saklaýar.
Maslahatda Türkiyäniň we Kiprdäki türk halkynyň hukuklaryny we bähbitlerini goramak üçin nämeleriň edilmelidigi ara alnyp maslahatlaşylar.
Terrorsyz Türkiye maksady hem geňeşiň gün tertibinde bolar. Degişli döwlet edaralary terror guramalaryny dargatmak tapgyryny tizleşdirmek üçin dürli ugurlar boýunça işlerini dowam etdirýärler.
Bu tagallalar we ýerindäki soňky ýagdaýlar maslahatda seljeriler. Siriýadaky we Yrakdaky wakalar ara alnyp maslahatlaşylar.
Milli Howpsuzlyk Geňeşiniň maslahatynda Russiýa-Ukraina urşy we 7-8-nji iýulda geçiriljek NATO-nyň sammitine taýýarlyk meseleleriniň hem ara alnyp maslahatlaşylmagyna garaşylýar.
