Kolumbiýa Karibdäki dartgynlyk sebäpli ABŞ bilen aňtaw maglumatlaryny paýlaşmagy bes etmegi buýurdy
Kolumbiýanyň prezidenti Gustawo Petro bu çäräniň Karib deňzinde ABŞ-nyň hüjümleri dowam edýänçä güýjünde galjakdygyny aýtdy.
Kolumbiýanyň prezidenti Gustawo Petro Kolumbiýanyň jemgyýetçilik howpsuzlyk güýçlerine Waşingtonyň Karibdäki gaýyklara hüjüm etmegi bes edýänçä çenli ABŞ-nyň aňtaw gulluklary bilen aňtaw maglumatlaryny paýlaşmagy togtatmak barada görkezme berdi.
Gustawo Petro “X” saýtyndan beren beýanatynda: “Karib deňzindäki gaýyklara raketaly hüjümler guralmaga dowam etdigi saýyn bu çäre dowam eder. Neşe serişdelerine garşy göreş Karib ilatynyň adam hukuklaryna tabyn bolmaly” diýip, belledi. Petro neşe serişdeleriniň bikanun dolanyşygyna garşy göreşde iki ýurduň hyzmatdaşlygyny göz öňünde tutupdy.
Bu karardan öň CNN Britaniýanyň öz aňtaw maglumatlarynyň ABŞ-da neşe söwdagärlerine garşy ölüm howply hüjümlerde ulanylýandygy baradaky aladalar sebäpli ABŞ bilen aňtaw maglumatlaryny paýlaşmagy bes edendigini görkezýän habar paýlaşypdy.
Hasabatda Britaniýanyň resmileriniň sentýabr aýyndan bäri azyndan 76 adamyň ölümine sebäp bolan hüjümleriň halkara hukugyny bozýandygyna ynanýandygy görkezildi.
BMG-niň Adam hukuklary boýunça ýokary komissary Wolker Türk hüjümleri "kabul ederliksiz" diýip häsýetlendirdi we öz edarasynyň "kazyýetden daşary öldürmeler" diýip atlandyran wakalar babatynda garaşsyz derňewleriň geçirilmeği barada çagyryş berdi.